ស្វាយរៀង៖ រដ្ឋមន្ត្រីទំនាក់ទំនងរដ្ឋសភា ព្រឹទ្ធសភា ឧបនាយករដ្ឋមន្ត្រី ម៉ែន សំអន បានជំរុញការសិក្សារបស់សិស្សនិសិ្សតឱ្យធ្វើការសិក្សាពេញមួយជីវិតដើម្បីចូលរួមដល់ការអភិវឌ្ឍប្រទេសជាតិ។
ថ្លែងក្នុងពិធីប្រគល់សញ្ញាបត្រជូននិស្សិតជ័យលាភីជាង ៣ពាន់នាក់ នៃសាកលវិទ្យាល័យស្វាយរៀង កាលពីថ្ងៃទី៣០ ខែមករា ក្នុងខេត្តស្វាយរៀង លោកស្រី ម៉ែន សំអន បានស្នើឲ្យនិស្សិតជ័យលាភីទាំងអស់ត្រូវពង្រឹងសមត្ថភាព ឱ្យកាន់តែមានប្រសិទ្ធភាពដល់ការស្ថាបនា និងការអភិវឌ្ឍប្រទេសជាតិ តាមរយៈការសិក្សាពេញមួយជីវិត ចូលរួមដោះស្រាយបញ្ហាសង្គមប្រកបដោយការទទួលខុសត្រូវ ចូលរួមកសាងភាពថ្លៃថ្នូរបស់សង្គម ចូលរួមបង្កើតស្នាដៃថ្មីឱ្យសង្គមជាតិ ចូលរួមលុបបំបាត់ព័ត៌មានមិនពិត និងត្រូវចេះតបស្នងគុណ។
ជាមួយគ្នានេះលោកស្រីក៏បានធ្វើការផ្សព្វផ្សាយអំពីជោគជ័យនៃមហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជា រយៈពេល ២ថ្ងៃ គឺថ្ងៃទី២៨ និង២៩ ខែមករា ឆ្នាំ២០២៣ ដោយថា គណបក្សប្រជាជនកម្ពុជា បានគិតគូរគ្រប់បែបយ៉ាង ដើម្បីជាឧត្តមប្រយោជន៍ជាតិ និងប្រជាជនកម្ពុជា ការប្រកាន់ខ្ជាប់នូវការអនុវត្តនយោបាយការបរទេសឯករាជ្យ និងគោលការណ៍នានានៃធម្មនុញ្ញរបស់ អង្គការសហប្រជាជាតិ និងអាស៊ាន និងការដាក់ចេញនូវគោលនយោបាយដ៏ថ្មីស្រឡាងមួយទៀត ក្នុងការពង្រាយអ្នកជំនាញកសិកម្មនៅគ្រប់ឃុំនៅទូទាំងប្រទេស ដើម្បីលើកកម្ពស់វិស័យកសិកម្មនៅកម្ពុជា៕
