បារាំង៖ ក្លិបអ្នកមានបារាំង Paris Saint-Germain បានប្រកាសនាំចូលជាផ្លូវការនូវអ្នកចាំទីវ័យ ២២ឆ្នាំ Gianluigi Donnarumma ក្រោយពីកីឡាកររូបនេះ បានក្លាយជាកីឡាករដែលគ្មានក្លិបលេង (Free Agent) ក្រោយកិច្ចសន្យាអស់សុពលភាពជាមួយ AC Milan។​ 

ប៉ុន្តែអ្វីដែលគួរឱ្យចាប់អារម្មណ៍បំផុតនោះ PSG មុនការមកដល់របស់ Donnarumma ក៏មានអ្នកចាំទីលំដាប់ខ្ពស់ ២រូបដែលអាចប្រើប្រាស់ និងប្រកួតប្រជែងបានផងដែរ រួមមានអ្នកចាំទីកូស្តារីកា Keylor Navas រួមទាំងអ្នកចាំទីសញ្ជាតិបារាំង Alphonse Areola ដែលបានចំណាយពេលមួយរដូវកាលកន្លងទៅជាមួយ Fulham ក្នុងក្របខណ្ឌ English Premier League កាលពីរដូវកាលមុន។

ប៉ុន្តែ! អ្នកគាំទ្រទាំងអស់ប្រាកដជាមានការភ្ញាក់ផ្អើល ប្រសិនបើបានឃើញនូវបញ្ជីកីឡាករអ្នកចាំទីរបស់ PSG ដែលមានចំនួន ៦នាក់ផ្សេងទៀតដែលកំពុងស្ថិតក្នុងបញ្ជីឈុតធំរបស់ក្លិបយក្សបារាំងនេះ។ អ្នកចាំទីទាំង ៦នាក់ផ្សេងទៀតនោះរួមមានដូចជា ទី១៖ អ្នកចាំទីសញ្ជាតិបារាំង Alexandre Letellier ដែល PSG នាំយកពីក្លិប Orleans US 45 កាលពីខែកញ្ញា ឆ្នាំ២០២០ កន្លងទៅ, ទី២៖ អ្នកចាំទីអេស្ប៉ាញ Sergio Rico ដែល PSG បានទិញយកពីក្លិប Sevilla ក្នុងតម្លៃ ៦លានអឺរ៉ូនៅឆ្នាំ២០២០, ទី៣៖​ អ្នកចាំទីម៉ាដាហ្គាស្កា វ័យ១៨ឆ្នាំ Mathyas Randriamamy, ទី៤៖ អ្នកចាំទីវ័យ១៩ឆ្នាំ សញ្ជាតិអ៊ីតាលី Denis Franchi ដែលតំឡើងមកពីថ្នាល U-19 របស់ក្លិបផ្ទាល់, ទី៥៖ Grarissone Innocent វ័យ២១ឆ្នាំ ដែលដាក់ឱ្យក្លិបបារាំងនៅលីគទី២ Caen ខ្ចីជើងពេញមួយរដូវកាល ២០២០ កន្លងទៅ និងចុងក្រោយគេទី៦៖ អ្នកចាំទីប៉ូឡូញ វ័យ២១ឆ្នាំ ដែលបានបញ្ចប់ការខ្ចីជើងពីក្លិបនៅលីគទី២បារាំង Chateauroux នៅឆ្នាំ២០២០កន្លងទៅ។ 

គួរបញ្ជាក់ថា សម្រាប់ដើមរដូវកាលថ្មីនេះ ក្លិប Paris Saint-Germain ដែលខកខានការឈ្នះជើងឯក Ligue1 ក្រោមការដឹកនាំរបស់លោក Mauricio Pochettino នឹងត្រូវចាប់ផ្តើមបើកឆាករដូវកាលថ្មី ដោយជួបជាមួយក្លិប Troyes នាថ្ងៃទី៨ ខែសីហា ខាងមុខនេះ៕