សាធារណរដ្ឋឆេក៖ នាយឧត្តមសេនីយ៍ NATO ចូលនិវត្តន៍ម្នាក់គឺលោក Petr Pavel បានផ្តួលលោកមហាសេដ្ឋីពាន់លាន និងជាអតីតនាយករដ្ឋមន្រ្តី លោក Andrej Babis នៅក្នុងការបោះឆ្នោតថ្នាក់ជាតិនៃសាធារណរដ្ឋឆេក និងបានក្លាយជាប្រធានាធិបតីទី៤ ក្នុងប្រវត្តិសាស្រ្តប្រទេសនៃដែនដីអឺរ៉ុប ដែលមានប្រជាជនប្រហែល ១០លាននាក់មួយនេះ។ 

លោក Pavel ដែលជាអតីតកងកម្លាំងទាហ៊ានប៉ារ៉ា ទទួលបានសំឡេងឆ្នោតគាំទ្រប្រមាណ ៥៨.៣ភាគរយ ខណៈដែលគូប្រជែងដ៏ធំបំផុតរបស់លោកគឺមហាសេដ្ឋី Andrej Babis ទទួលបានសំឡេងគាំទ្រប្រហែល ៤១,៧ភាគរយ។ នេះបើផ្អែកតាមទិន្នន័យលទ្ធផលសរុបចុងក្រោយដែលចេញផ្សាយជាផ្លូវការដោយការិយាល័យស្ថិតិឆេក។ 

ក្រោយលទ្ធផលបានបង្ហាញពីជ័យជម្នះ លោក Petr Pavel ថ្លែងថា៖ "ខ្ញុំសូមថ្លែងអំណរគុណជាខ្លាំងចំពោះអ្នកដែលបានបោះឆ្នោតឱ្យខ្ញុំ និងអរគុណអ្នកដែលមិនបានបោះឆ្នោតឱ្យខ្ញុំក្តី ប៉ុន្តែក៏មានវត្តមានមកកាន់មណ្ឌលបោះឆ្នោតផងដែរ ព្រោះកាយវិការទាំងអស់នេះបានបញ្ជាក់យ៉ាងច្បាស់ថា ពលរដ្ឋយើងគោរពលទ្ធិប្រជាធិបតេយ្យ និងមានការបារម្ភ និងយកចិត្តទុកដាក់ចំពោះប្រទេសមួយនេះ"។ លោកបន្ថែមទៀតថា៖ "ខ្ញុំអាចមើលឃើញរឿងដ៏មានតម្លៃជាច្រើនដូចជាការពិត សេចក្តីថ្លៃថ្នូរ ការគោរព និងភាពរាបសារបានលេចឡើងនៅក្នុងការបោះឆ្នោតនេះ"។

លោក Petr Pavel បច្ចុប្បន្នមានវ័យ ៦១ឆ្នាំនឹងចូលកាន់តំណែងនាខែមីនាខាងមុខនេះ ដោយនឹងជំនួសតំណែងប្រធានាធិបតីបច្ចុប្បន្នលោក Milos Zeman ដែលជាអ្នកនយោបាយស្ងប់ស្ងាត់ និងមិនសូវនិយាយស្តី និងដែលបានជំរុញឱ្យមានឆេកទំនាក់ទំនងជិតស្និទ្ធជាមួយរុស្សី មុនពេលប្តូរនយោបាយការទូតជាមួយរុស្សីវិញស្ទើរតែ ១៨០ដឺក្រេក្រោយពេលដែលរុស្សីបានធ្វើការវាយលុកទៅលើអ៊ុយក្រែនកាលពីខែកុម្ភៈកន្លងទៅ។

ដោយឡែក លោក Andrej Babis ដែលជាអតីតនាយករដ្ឋមន្រ្តីឆេកកាន់តំណែងពីឆ្នាំ២០១៧ ដល់ឆ្នាំ២០២១ បានសម្តែងនូវការអបអរសាទរចំពោះលោក Pavel ផងដែរ ដោយលោកបាននិយាយថា លោកសូមជូនពរលោកក្នុងនាមជាប្រធានាធិបតីសម្រាប់ប្រជាជនឆេកទាំងអស់ និងជូនពរលោកឱ្យដោះស្រាយឱ្យបានល្អចំពោះបញ្ហារសើបនានា ក៏ដូចជានាំយកនូវផលប្រយោជន៍សម្រាប់ប្រទេសឆេកទាំងមូលផងដែរ៕