ភ្នំពេញ៖ គណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប បានចេញមុខច្រានចោលលើគណនីអនាមិកមួយដែលមានឈ្មោះថា «លោកចោរស្របច្បាប់» ដេលបានលួចដាក់រូបថតប្រធានគ.ជ.ប លោក ប្រាជ្ញ ច័ន្ទ។ គ.ជ.ប បានអះអាងថាពេលនេះកំពុងសហការជាមួយស្ថាប័នពាក់ព័ន្ធ ដើម្បីមានវិធានការស្វែងរកម្ចាស់គណនីនេះឱ្យមកទទួលខុសត្រូវផ្លូវច្បាប់ផងដែរ។

ក្នុងសេចក្ដីប្រកាសព័ត៌មានចុះថ្ងៃទី២៧ ខែមករា ឆ្នាំ២០២៣ អ្នកនាំពាក្យគ.ជ.ប លោក ឌឹម សុវណ្ណារុំ បានបញ្ជាក់ថា ការដាក់ឈ្មោះបែបនេះ និងលួចយករូបថតរបស់ប្រធាន គ.ជ.ប ទៅដាក់គឺជាទង្វើអសីលធម៌ និងមិនអាចទទួលយកបាន ក្នុងចេតនាទុច្ចរិត មាក់ងាយស្ថាប័នជាតិ និងចេតនាបំផ្លាញលទ្ធិប្រជាធិបតេយ្យនៅកម្ពុជា គ.ជ.ប។

លោកបញ្ជាក់ថា៖ «គ.ជ.ប បាននិងកំពុងសហការជាមួយស្ថាប័នពាក់ព័ន្ធ ដើម្បីមានវិធានការស្វែងរកជនអគតិបំពុលសង្គម ដែលធ្វើឱ្យប៉ះពាល់ដល់កេរ្តិ៍ឈ្មោះ និងសេចក្ដីថ្លៃថ្នូរបស់គណៈកម្មាធិការជាតិរៀបចំការបោះឆ្នោតដែលជាស្ថាប័នកំពូលដូចមានចែងក្នុងរដ្ឋធម្មនុញ្ញ»។

លោក ឌឹម សុវណ្ណារុំ ក៏អំពាវនាវដល់សាធារណជន សូមធ្វើការផ្សព្វផ្សាយព័ត៌មានប្រកបដោយវិជ្ជាជីវៈ និងការទទួលខុសត្រូវ ចៀសវាងការបំភ្លៃ បំផ្លើស បរិហាកេរ្តិ៍ ប្រាសចាកពីការពិត បើមិនដូច្នោះទេ គ.ជ.ប គ្មានជម្រើសអ្វី ក្រៅតែពីចាត់វិធានការតាមផ្លូវច្បាប់ប៉ុណ្ណោះ៕