ថៃ៖ មនុស្សចំនួន ១១នាក់ ក្នុងនោះមានកុមារចំនួន ២នាក់ បានឆេះស្លាប់នៅក្នុងហេតុការណ៍ឆេះឡានដឹកអ្នកដំណើរ នៅភាគកណ្តាលប្រទេសថៃ ចំថ្ងៃទី២ នៃពិធីបុណ្យចូលឆ្នាំថ្មីប្រពៃណីចិន។ នេះបើតាមការបញ្ជាក់របស់ប៉ូលិសថៃ នៅថ្ងៃទី២៣ ខែមករាម្សិលមិញនេះ។ 

បើតាមសេចក្តីរាយការណ៍រស់សមត្ថកិច្ចបានឱ្យដឹងថា រថយន្តនោះដឹកអ្នកដំណើរចំនួន ១២នាក់ ធ្វើដំណើរចេញពីខេត្ត Amnat Charoen ភាគឥសាន្តប្រទេសថៃ ឆ្ពោះទៅកាន់ទីក្រុងបាងកក និងបានជួបប្រទះគ្រោះអកុសលនេះនៅក្នុងខេត្ត Nakhon Ratchasima។ ប្រភពពីសមត្ថកិច្ចដដែលបានបន្តថា ក្នុងហេតុការណ៍នេះមានបុរសម្នាក់រួចផុតជីវិតពីគ្រោះថ្នាក់នេះដោយតោងចេញតាមបង្អួច ខណៈជនរងគ្រោះផ្សេងៗទៀតបានស្លាប់ដោយជាប់ក្នុងរថយន្តដែលត្រូវផ្ទុះឆេះ។

ជនរងគ្រោះដែលរួចផុតជីវិតគឺជាយុវជនម្នាក់វ័យ ២០ឆ្នាំដែលបានអះអាងថា ខ្លួនបានលង់លក់ក្នុងអំឡុងការធ្វើដំណើរ និងដឹងខ្លួនពេលមានអ្នកដំណើរស្រែក។ យុវជនខាងលើបានបន្តថា ពេលដឹងខ្លួនមកឡានក៏ក្រឡាប់ ហើយគេមិនដឹងថាមានហេតុការណ៍អ្វីឡើយ ដឹងត្រឹមថាភ្លើងចាប់ផ្តើមឆេះពីផ្នែកខាងក្រោយរថយន្ត។

ដោយឡែក បុគ្គលិកក្រុមសង្គ្រោះក្នុងតំបន់បានបញ្ជាក់ថា រថយន្តបានផ្ទុះឡើងភ្លាមក្រោយការឆាបឆេះមិនបាន ៣០វិនាទីផង ដោយក្រុមសង្គ្រោះមិនអាចធ្វើអ្វីបានឡើយ ស្របពេលដែលឡានបានផ្ទុះផ្ទួនៗចំនួន ៣ ទៅ ៤ដង។ 

ដោយឡែក តាមរបាយការណ៍បន្ថែមរបស់សមត្ថកិច្ចបញ្ជាក់ថា រថយន្តនេះប្រើប្រាស់ទាំងប្រេងសាំង និងបំពាក់ប្រព័ន្ធហ្គាស ប៉ុន្តែសេចក្តីរាយការណ៍ដំបូងមិនបានបង្ហាញថាធុងហ្គាសមានការលេចធ្លាយទេ។ សេចក្តីសន្និដ្ឋានដំបូង ការផ្ទុះនេះអាចបណ្តាលមកពីការហៀរប្រេងសាំង ប៉ុន្តែយ៉ាងណាក៏ដោយ ករណីខាងលើនេះបច្ចុប្បន្នកំពុងស្ថិតក្នុងការស៊៊ើបអង្កេតនៅឡើយ៕