ភ្នំពេញ៖ ក្រុមអ្នកអភិរក្សនៃគម្រោងខ្លាត្រីកម្ពុជាបានអះអាងថា បានរកឃើញវត្តមានខ្លាត្រីបណ្តើរកូនជាលើកដំបូងនៅក្នុងប្រទេសកម្ពុជា ក្រោយតាមដានខ្លាត្រីនៅកម្ពុជាជាង ៥ឆ្នាំមកហើយ។

ក្រុមអ្នកអភិរក្សនេះបានបញ្ជាក់នៅលើបណ្តាញសង្គមរបស់ខ្លួនដោយក្តីរំភើប ដែលឃើញខ្លាត្រីបណ្តើរកូននេះ ដោយក្រុមការងារអភិរក្សបានតាមដានខ្លាត្រីនៅកម្ពុជាជាង ៥ឆ្នាំមកហើយ ចាប់ពីឆ្នាំ២០១៧មក។

ក្រុមអ្នកអភិរក្សថា៖ «ឆ្នាំនេះ យើងទទួលបានវីដេអូខ្លាត្រីបណ្តើរកូនជាលើកដំបូងនៅក្នុងប្រទេសកម្ពុជា ហើយយើងពិតជារំភើប និងរីករាយសម្រាប់ដំណឹងដ៏អស្ចារ្យនេះ។

ប្រភពដដែលបានឱ្យដឹងថា កូនខ្លាត្រីត្រូវបានកើតបន្ទាប់ពីមេពពោះ ពី៦០ ទៅ ៧០ថ្ងៃ ដែលជាធម្មតាកើតកូនម្តងបានតែពី១ក្បាល ទៅ៤ក្បាលប៉ុណ្ណោះ។ កូនខ្លាត្រីដែលទើបកើតមានទម្ងន់ ប្រមាណជា ១៥០ក្រាម និងរៀនប្រម៉ាញ់ចំណីដោយមើល និងត្រាប់តាមមេ ហើយនៅអាយុ ១០ខែ ទើបកូនខ្លាត្រីវ័យក្មេងត្រៀមខ្លួនរួចរាល់ដើម្បីចេញទៅរស់នៅដោយខ្លួនឯង។

គួរឱ្យដឹងដែរថា ខ្លាត្រី មានឈ្មោះវិទ្យាសាស្ត្រថា Prionailurus viverrinu ដែលមើលទៅដូចគ្នាខ្លាំងនឹងឆ្មាស្រុក ប៉ុន្តែវាមានជំនាញគួរឱ្យភ្ញាក់ផ្អើលមួយ ដែលផ្ទុយគ្នាទៅនឹងឆ្មាស្រុកទូទៅគឺការប្រមាញ់ចំណី ដែលជាប្រភេទពពួកសត្វក្នុងទឹកយ៉ាងសកម្មបំផុតនៅពេលយប់៕