អារ៉ាប់រួម៖ ប្រធាននៃក្រុមហ៊ុនប្រេងជាតិរបស់រាជាណាចក្រអារ៉ាប់អេមីរ៉ាត់ ឬរាជាណាចក្រអារ៉ាប់រួម ត្រូវបានជ្រើសតាំងឱ្យកាន់តំណែងជាប្រធានក្នុងកិច្ចប្រជុំស្ដីពីការប្រែប្រួលអាកាសធាតុ COP28 ដែលទង្វើនេះត្រូវបានរងការរិះគន់ជាខ្លាំងពីបណ្ដាសកម្មជនបរិស្ថាន។

ព្រះអង្គម្ចាស់ស៊ុលតង់ Ahmed Al-Jaber ដែលជាអ្នកមានតំណែង និងតួនាទីខ្ពស់ក្នុងក្រុមហ៊ុនប្រេងជាតិ Abu Dhabi (Abu Dhabi National Oil Company ឬហៅកាត់ថា (ADNOC) គឺជានាយកប្រតិបត្តិ CEO ដំបូងគេដែលទទួលបានតំណែងសំខាន់ក្នុងវេទិកាកិច្ចប្រជុំរបស់អង្គការសហប្រជាជាតិ។ នេះបើយោងតាមសេចក្តីប្រកាសមួយចុះផ្សាយដោយភ្នាក់ងារសារព័ត៌មានអារ៉ាប់រួម (WAM)។

នៅក្នុងសេចក្តីប្រកាសផ្លូវការនោះ ព្រះអង្គម្ចាស់ Jaber ថ្លែងយ៉ាងដូច្នេះថា៖ “យើងនឹងនាំមកនូវវិធីសាស្រ្តតម្រង់ទិសជាក់ស្តែង និងដំណោះស្រាយដែលផ្តល់នូវវឌ្ឍនភាពផ្លាស់ប្តូរសម្រាប់បញ្ហាអាកាសធាតុ និងសម្រាប់កំណើនសេដ្ឋកិច្ចដែលមានការសាយភាយកាបូនទាប”។ 

ភ្លាមៗក្រោយសេចក្តីប្រកាសនេះបានធ្វើឡើង សកម្មជនបរិស្ថានបានចេញមុខប្រតិកម្មដោយព្រមានថាការចូលរួមរបស់ក្នុងតួនាទីសំខាន់ពីប្រទេសដែលផ្តោតលើឧស្សាហកម្មប្រេង អាចនឹងពន្យឺតការវិវឌ្ឍន៍ក្នុងការប្រយុទ្ធប្រឆាំងនឹងការឡើងកំដៅផែនដី។ លោក Harjeet Singh ប្រធានផ្នែកគោលនយោបាយយុទ្ធសាស្រ្តសកល នៃបណ្តាញអន្តរជាតិនៃសកម្មភាពអាកាសធាតុ បានលើកឡើងថា ការតែងតាំងព្រះអង្គម្ចាស់ Jaber គឺជាការបង្កនូវជម្លោះផលប្រយោជន៍ដ៏ខ្លាំងក្លាមួយ។

គួរបញ្ជាក់ថា កិច្ចប្រជុំ COP27 បានធ្វើឡើងកាលពីខែវិច្ឆិកាកន្លងទៅ នៅឯប្រទេសអេហ្ស៊ីបបានបញ្ចប់ដោយការអនុម័តអត្ថបទច្បាប់ដែលមានការជជែកយ៉ាងក្តៅគគុកស្តីពីបញ្ហាជំនួយដល់ប្រទេសក្រីក្រដែលរងផលប៉ះពាល់ដោយការប្រែប្រួលអាកាសធាតុ ប៉ុន្តែកិច្ចប្រជុំនេះបានបរាជ័យទៅលើការប្តេជ្ញាកាត់បន្ថយការបំភាយឧស្ម័នផ្ទះកញ្ចក់ពីឧស្សាហកម្មធំៗ។

កិច្ចប្រជុំ COP28 ឆ្នាំនេះ នឹងធ្វើឡើងនៅខែវិច្ឆិកា និងខែធ្នូ ខាងមុខនេះ នាទីក្រុង Abu Dhabi រាជាណាចក្រអារ៉ាប់រួម បានបង្កឱ្យមានការព្រួយបារម្ភពីសកម្មជនដែលជំរុញឱ្យមានការផ្លាស់ប្តូរឆ្ងាយពីការប្រើប្រាស់ថាមពលប្រេងដែលប្រភពដ៏ធំនៃការផលិតឧស្ម័នផ្ទះកញ្ចក់៕