ស្រីលង្កា៖ នៅថ្ងៃព្រហស្បតិ៍ ទី១២ ខែមករានេះ តុលាការកំពូលរបស់ប្រទេសស្រីលង្កា បានចេញសេចក្តីសម្រេចមួយដែលបានបញ្ជាក់ថា ភាពអសកម្មរបស់អតីតប្រធានាធិបតីប្រទេសនេះ រួមទាំងមេដឹកនាំចំនួន ៤រូបផ្សេងទៀតបានបណ្តាលឱ្យមានហេតុការណ៍វាយប្រហារបំផ្ទុះគ្រាប់បែកមួយកាលពីអំឡុងឆ្នាំ២០១៩ ដែលបណ្ដាលឱ្យមនុស្សជិត ២៧០នាក់បានស្លាប់។ មិនត្រឹមតែប៉ុណ្ណោះ តុលាការក៏បានបង្គាប់ឱ្យបុគ្គលទាំង ៥រូបខាងលើនេះ ត្រូវបង់សំណងចំពោះការរំលោភសិទ្ធិជាមូលដ្ឋានរបស់ជនរងគ្រោះ ទៅឱ្យក្រុមគ្រួសាររបស់ពួកគេ។

ការសម្រេចក្តីមួយដែលធ្វើឡើងដោយក្រុមប្រឹក្សាតុលាការកំពូលមានចៅក្រមកាត់ក្តីចំនួន ៧រូប បានបង្គាប់ឱ្យអតីតប្រធានាធិបតីស្រីលង្កា លោក Maithripala Sirisena ឱ្យបង់ប្រាក់ចំនួន ១០០លានរូពី ឬស្មើនឹងប្រមាណ ២៧៣,៣០០ដុល្លាអាមេរិកដែលជាប្រាក់ចេញពីមូលនិធិរបស់លោក ខណៈដែលមេប៉ូលិស រួមទាំងមន្ត្រីទទួលបន្ទុកចារកម្មកំពូលពីររូប និងអគ្គលេខាធិការក្រសួងការពារជាតិនៅអំឡុងពេលដែលកើតហេតុ ត្រូវរួមគ្នាបង់ប្រាក់សរុបចំនួន ២១០លានរូពី ឬស្មើនឹងប្រមាណ ៥៧៤,០០០ ដុល្លារអាមេរិក។

ក្រុមមូស្លីមក្នុងប្រទេសស្រីលង្កាចំនួនពីរ ដែលគេដឹងថាមានការស្មោះស្ម័គ្រនឹងក្រុមឧទ្ទាមរដ្ឋឥស្លាម ត្រូវបានគេចោទប្រកាន់ថាបានធ្វើការវាយប្រហារបំផ្ទុះគ្រាប់បែកអត្តឃាតចំនួនប្រាំមួយក្នុងពេលដំណាលគ្នា ក្នុងគោលដៅសំដៅទៅលើអ្នកចូលរួមពិធីសាសនានៅព្រះវិហារគ្រិស្តសាសនាចំនួនបីកន្លែង ព្រមទាំងវាយប្រហារចំពោះអ្នកទេសចរដែលកំពុងបរិភោគអាហារពេលព្រឹកនៅសណ្ឋាគារទំនើបៗចំនួន ៣ផ្សេងទៀត។

គួរឱ្យដឹងថា ហេតុការណ៍នៃការវាយប្រហារដោយគ្រាប់បែកអត្តឃាតនេះ ក្រៅពីបណ្តាលឱ្យមនុស្ស ២៧០នាក់ស្លាប់ ក៏នៅមានមនុស្សប្រមាណជា ៥០០នាក់ផ្សេងទៀតរងរបួសផងដែរ។ កន្លងមក រដ្ឋាភិបាលបានធ្វើការចោទប្រកាន់ និងកាត់ទោសមនុស្សរាប់សិបនាក់ដែលជាប់ពាក់ព័ន្ធនឹងករណីវាយប្រហារនេះ ប៉ុន្តែមេដឹកនាំនៃវិហារសាសនាកាតូលិកក្នុងប្រទេសស្រីលង្កា បានទាមទារឱ្យមានការវែកមុខអ្នកដែលឃុបឃិតគ្នាធំពីលើក្នុងហេតុការណ៍នេះ៕