ភ្នំពេញ៖ អ្នកលេងគុនចម្រុះកម្ពុជា ចាន់ រតនា បានលើកឡើងថា រូបគេពេញចិត្ត នឹងស្វាគមន៍ដោយក្ដីរីករាយ ចំពោះការប្រកាសរបស់កីឡាករជើងខ្លាំងឥណ្ឌូនេស៊ី Eko Roni Saputra ដែលចង់ណាត់ជួបរតនាលើសង្វៀនលំដាប់ពិភពលោក ONE Championship នាពេលខាងមុខ។

ការឆ្លើយតបរបស់កីឡាករ ចាន់ រតនា បានធ្វើឡើងបន្ទាប់ពីកីឡាករ Eko Roni Saputra បានប្រកាសចង់ជួប និងសាកថ្វីដៃជាមួយ ចាន់ រតនា ពិសេសក្នុងគោលបំណងចង់សងសឹកឲ្យមិត្តរួមជាតិរបស់គេ ២រូប ដែលធ្លាប់បរាជ័យក្រោមថ្វីដៃរបស់អ្នកលេងគុនចម្រុះកម្ពុជា ចាន់ រតនា កាលពីឆ្នាំ២០១៨ និងឆ្នាំ២០១៩  ។

ចាន់ រតនា បានបញ្ជាក់ថា ខ្លួនរីករាយក្នុងការត្រៀមជួប Eko Roni ដ្បិតគេចង់សងសឹកឲ្យមិត្តរួមជាតិ ។ ចំពោះសមត្ថភាពរបស់កីឡាករឥណ្ឌូនេស៊ីរូបនេះ ក៏មិនចាញ់កីឡាករ Rudy Agustian និង Abrou Fernandes ដែលខ្លួនធ្លាប់យកឈ្នះលើសង្វៀន ONE ដែរ ប៉ុន្ដែ រតនា រំពឹងថា នឹងធ្វើឲ្យបានល្អបំផុត ដើម្បីរក្សាកំណត់ត្រាមិនចាញ់កីឡាករឥណ្ឌូនេស៊ី ។

ដោយឡែក បើយើងចាប់អារម្មណ៍ប្រវត្តិលើសង្វៀន ONE Championship រវាងអ្នកទាំងពីរវិញហាក់មិនលើសគ្នាប៉ុន្មាននោះឡើយ គ្រាន់តែកីឡាករកម្ពុជាមានប្រៀបជាងពាក់ព័ន្ធនឹងបទពិសោធន៍ ពោលគឺ ចាន់ រតនា ធ្លាប់ប្រកួតលើសង្វៀនលំដាប់ពិភពលោកនេះ ១០ដង ឈ្នះ ៧ និងចាញ់ ៣ ខណៈ Eko Roni ធ្លាប់ប្រកួតបាន ៥ដង ឈ្នះ ៤ និងចាញ់ម្ដង ដោយកាលពីដើមឆ្នាំ២០២០ គេធ្លាប់យកឈ្នះកីឡាករកម្ពុជា ខុន ស៊ីចាន់ ត្រឹមទឹកទី១៕