ភ្នំពេញ៖ ប្រធានបក្សប្រជាជនកម្ពុជា សម្ដេចតេជោ ហ៊ុន សែន ប្រកាសឲ្យបន្តការពង្រឹងសាមគ្គីភាពផ្ទៃក្នុងឲ្យរឹងមាំ ដើម្បីទប់ស្កាត់ការញុះញ៉ង់ពីខាងក្រៅ។ សម្ដេចបញ្ជាក់ថា ការរក្សាភាពរឹងមាំផ្ទៃក្នុងគឺជាប្រសិទ្ធភាពក្នុងការរក្សាស្ថិរភាព និងការរីកចម្រើនបច្ចុប្បន្ន។ 

ក្នុងមេទ្ទីងរំឮកខួបលើកទី៤៤ នៃទិវាជ័យជម្នះ ៧ មករា ឆ្នាំ២០២៣ សម្ដេចតេជោ ហ៊ុន សែន បានរម្លឹកថាប្រជាជាតិមួយដែលមានឯកភាពជាតិប្ដូរផ្ដាច់ការពារឯករាជ្យ សេរីភាពរបស់ខ្លួន មិនអាចត្រូវអនុភាពខាងក្រៅណាធ្វើឱ្យបរាជ័យបានឡើយ។

សម្ដេចតេជោបន្ថែមថា៖ «ដូច្នេះត្រូវរួមគ្នាថែរក្សាពូនជ្រុំរាល់សមិទ្ធផលដ៏ថ្លៃថ្លានៃសង្គមជាតិឱ្យបានគង់វង្ស និងរឹងមាំឡើងគ្រប់កាលៈទេសៈ។ ក្នុងស្មារីតនេះ យើងទាំងអស់គ្នាប្ដេជ្ញាដាច់ខាតការពារសន្ដិផាព និងឯកភាពជាតិដែលយើងសម្រេចបានមកដោយលំបាកបំផុតនេះឱ្យស្ថិតស្ថេរ គង់វង្សជានិច្ច មិនឱ្យជនណាឬអនុភាពណាមកបំផ្លាញបានឡើយ»។ 

កម្ពុជាទើបតែរកឃើញការរួបរួមជាតិឡើងវិញនៅថ្ងៃទី២៨ ខែធ្នូ ឆ្នាំ១៩៩៨ តាមរយៈនយោបាយឈ្នះ-ឈ្នះរបស់សម្ដេចតេជោ ហ៊ុន សែន បន្ទាប់ពីប្រទេសនេះបានបែកបាក់គ្នាអស់ជិត៥០០ឆ្នាំក្នុងប្រវត្តិសាស្ត្ររបស់ខ្លួន។ ទំរាំរកបានការឯកភាព សាមគ្គីជាតិនេះកម្ពុជាបានឆ្លងកាត់ឧបសគ្គដ៏លំបាកជាច្រើន ដែលរដ្ឋាភិបាលបានប្រកាសហើយថានឹងមិនឱ្យភាពបែកបាក់ត្រលប់មកជាថ្មីនោះទេ៕