អង់គ្លេស៖ គ្រូបង្វឹកក្លិប Manchester United លោក Erik Ten Hag បាននិយាយថា ក្រុមរបស់លោកមិនមែនជាបេក្ខភាពប្រជែងជើងឯកនៅឡើយទេក្នុងរដូវកាលនេះ ប៉ុន្តែលោកបានបញ្ជាក់ថា ក្រុមទាំងមូលកំពុងតែមានភាពល្អប្រសើរឡើងជាបន្តបន្ទាប់ ក្រោយជ័យជម្នះផ្ទួនៗជាបន្តបន្ទាប់ និងជួយឱ្យក្រុមកំពុងឈរនៅក្នុងតំបន់កំពូលទាំងបួន (Top4)។

ប្រកួតចុងក្រោយបង្អស់ Manchester United បានបន្តរកបានជ័យជម្នះក្នុងលីគ ៤ប្រកួតជាប់ៗគ្នា និងបន្តកាត់បន្ថយគម្លាតនាំមុខពីក្រុមកំពូលតារាង Arsenal មកនៅត្រឹម ៩ពិន្ទុប៉ុណ្ណោះ។ ក្រុមរហស្សនាមបិសាចក្រហម បានជួបនូវភាពដុនដាបខ្លាំងជាពិសេសរដូវកាលមុន ដែលក្លិបបានបញ្ចប់រដូវកាលជាមួយពិន្ទុតិចបំផុត និងទទួលបានត្រឹម ៥៨ពិន្ទុប៉ុណ្ណោះ ខណៈជើងឯកបានទៅលើក្រុម Manchester City ដែលរកបានរហូតដល់ ៩៨ពិន្ទុនៅថ្ងៃបិទបញ្ចប់រដូវកាល។ 

នៅពេលអ្នកព័ត៌៌មានសាកសួរពីលទ្ធភាពប្រជែងជើងឯក លោក Ten Hag បាននិយាយថា៖ "វាជាជំហានដ៏ធំមួយ។ វាពិបាកទៅរួច ប៉ុន្តែយើងត្រូវទទួលស្គាល់ និងជឿជាក់លើការវិវត្តន៍ដែលវាជាសញ្ញាណល្អមួយ។ យើងបានប្រឹងប្រែង ១០០ភាគរយរាល់ការប្រកួត និងផ្តោតទាំងផ្លូវកាយ និងផ្លូវចិត្តជឿជាក់ថា យើងអាចនឹងប្រជែងជើងឯកបាននាពេលខាងមុខ"។

Manchester United រកបានជ័យជម្នះក្នុងលីគ ៤ប្រកួតជាប់ៗគ្នា ដោយមិនរបូតគ្រាប់បាល់មួយគ្រាប់សោះជាលើកដំបូង តាំងពីខែតុលា ឆ្នាំ២០១៧ និងមិនរបូតគ្រាប់បាល់សោះក្នុងទឹកដី រាប់ចាប់ពីប្រកួតទល់នឹង Arsenal ជាមួយជ័យជម្នះ ៣-១។ ប្រកួតបន្ទាប់ Man Utd នឹងត្រូវជួបជាមួយ Everton ក្នុងពាន FA Cup នាថ្ងៃ៧ ខែមករា វេលាម៉ោង ៣ទាបភ្លឺ មុននឹងបន្តជួប Charlton ក្នុងពាន EFL Cup នាថ្ងៃពុធ ទី១១ ខែមករា វេលាម៉ោង ៣ទាបភ្លឺ មុននឹងបន្តប្រកួតសំខាន់ប៉ះជាមួយ Manchester City នៅក្នុងក្របខណ្ឌ Premier League នាថ្ងៃសៅរ៍ ទី១៤ ខែមករា វេលាម៉ោង ៧៖៣០នាទីយប់ ដែលទាំងបីប្រកួតធ្វើឡើងនៅកីឡដ្ឋាន Old Trafford៕