សម្ដេចតេជោ ហ៊ុន សែន ចេញអនុក្រឹត្យស្ដីពីការកែប្រែ និងដំឡើងប្រាក់បំណាច់មុខងារមន្ដ្រីរាជការស៊ីវិល
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានចេញអនុក្រឹត្យស្ដីពីការកែប្រែនិងដំឡើងប្រាក់បំណាច់មុខងារមន្ដ្រីរាជការស៊ីវិល។ នេះបើតាមអនុក្រឹត្យចេញនៅថ្ងៃទី០៥ ខែមករា ឆ្នាំ២០២៣។
យោងតាមសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣ ដែលត្រូវបានកិច្ចប្រជុំពេញអង្គគណៈរដ្ឋមន្ត្រី អនុម័តកាលពីថ្ងៃទី២៨ ខែតុលា ឆ្នាំ២០២២ បានឱ្យដឹងថា ចាប់ពីខែមករា ឆ្នាំ២០២៣ បៀវត្សអប្បបរមារបស់មន្ត្រីរាជការស៊ីវិល នឹងត្រូវបានដំឡើងពីចំនួន ១ ១៧២ ៥០០ រៀល នៅឆ្នាំ២០២២ ដល់ប្រមាណ ១ ៣០០ ០០០រៀល។
ដោយឡែក គ្រូបង្រៀន និងគ្រូពេទ្យ នឹងត្រូវបានដំឡើងពីចំនួន ១ ២៧២ ៥០០រៀល ដល់ប្រមាណ ១ ៤០០ ០០០រៀល ចំពោះបៀវត្សយោធិន (ពលទោ) នឹងត្រូវបានដំឡើងពីចំនួន ១ ១២៣ ៥០០រៀល (ដោយមិនគិតបញ្ចូលរបបអង្ករ) ដល់ប្រមាណ ១ ២៥១ ០០០រៀល (ដោយមិនគិតបញ្ចូលរបបអង្ករ) ហើយបើគិតបញ្ចូលទាំងរបបអង្ករ ត្រូវជាប្រមាណ ១ ៣០៩ ៤៧៧រៀល។
លើសពីនេះ បៀវត្សនគរបាល (ពលបាលត្រី) នឹងត្រូវបានដំឡើងពីចំនួន ១ ២៥៦ ៩៧៧រៀល (ដោយគិតបញ្ចូលទាំងរបបអង្ករ) នៅឆ្នាំ២០២២ ដល់ប្រមាណ ១ ៣៨៤ ៤៧៧រៀល (ដោយគិតបញ្ចូលទាំងរបបអង្ករ) នៅឆ្នាំ២០២៣។
ជាមួយគម្រោងដំឡើងប្រាក់បៀវត្សជូនមន្ត្រីរាជការនេះ រាជរដ្ឋាភិបាលគ្រោងថវិកាប្រមាណជាង ៩ ៥៥៥ប៊ីលានរៀល ឬប្រមាណ ២ ២៩៥លានដុល្លារអាមេរិក សម្រាប់ចំណាយបន្ទុកបុគ្គលិករដ្ឋនៅក្នុងឆ្នាំ២០២៣។
គួរឱ្យដឹងដែរថា អនុក្រឹត្យស្ដីពីការកែប្រែ និងដំឡើងប្រាក់បំណាច់មុខងារមន្ដ្រីរាជការស៊ីវិលនឹងអនុវត្តចាប់ពីថ្ងៃទី១ ខែមករា ឆ្នាំ២០២៣ នេះតទៅ៕
