ភ្នំពេញ៖ លោក Nate Thayer ជាអ្នកកាសែតអាមេរិកតែម្នាក់គត់ ដែលបានធ្វើបទសម្ភាសន៍ជាមួយមេដឹកនាំប្រល័យពូជសាសន៍ខ្មែរក្រហម ប៉ុល ពត ក្នុងឆ្នាំ១៩៩៧ បានទទួលមរណភាព ក្នុងអាយុ ៦២ឆ្នាំ។

លោក Nate Thayer បានទទួលមរណភាព កាលពីថ្ងៃអង្គារសប្តាហ៍មុន នៅឯគេហដ្ឋានរបស់លោក ក្នុងទីក្រុង Falmouth រដ្ឋ Massachusetts សហរដ្ឋអាមេរិក។ លោកមានជំងឺជាច្រើន បានធ្លាក់ខ្លួនឈឺធ្ងន់ធ្ងរអស់រយៈពេលជាច្រើនខែមកហើយ។ នេះបើតាមបងប្រុសលោកThayer បញ្ចាក់ដល់សារព័ត៌មាន AFP។

លោក Thayer បានចំណាយពេលជាច្រើនឆ្នាំ ក្នុងការរាយការណ៍ព័ត៌មានពីនយោបាយកម្ពុជា និងសង្គម ក្នុងនោះរួមមានទាំងរបបខ្មែរក្រហមផង ដែលបានកាប់សម្លាប់រង្គាលមនុស្សច្រើនជាងមួយលាននាក់ នៅចន្លោះពីឆ្នាំ១៩៧៥ ដល់ ឆ្នាំ១៩៧៩។

បទសម្ភាសន៍ឆ្នាំ១៩៩៧ របស់គាត់ជាមួយមេដឹកនាំរបបប្រល័យពូជសាសន៍នៃខ្មែរក្រហម គឺជាលើកទីមួយក្នុងរយៈពេលពីរទសវត្សរ៍ដែល ប៉ុល ពត បានជួបជាមួយអ្នកសារព័ត៌មាន។

គួរឱ្យដឹងដែលថា លោក Thayer បានចាប់ផ្ដើមការងារដំបូងជាអ្នកកាសែតបម្រើការឱ្យទីភ្នាក់ងារសារព័ត៌មាន Associated Press នៅឆ្នាំ១៩៨៩ និងកាសែតចំនួនទៀតដូចជា Phnom Penh Post និង Far Eastern Economic ជាដើម។

ជាមួយគ្នានេះដែរ រដ្ឋមន្រ្តីក្រសួងព័ត៌មានលោក ខៀវ កាញារីទ្ធ បានសសេរលើបណ្តាញសង្គម ចូលរួមរំលែកទុក្ខអ្នកកាសែតអាមេរិកមួយរូបនេះផងដែរ។

លោកថា៖ «ទើបទទួលដំណឹងពីមិត្តភក្តិអ្នកកាសែតនៅក្រៅប្រទេសអោយដឹងថា Nate Thayer អ្នកកាសែតជើងចាស់ម្នាក់ និងជាអ្នកកាសែតបស្ចឹមប្រទេសតែម្នាក់គត់ដែលបានធ្វើសម្ភាសន៍ ប៉ុល ពត ក្រោយ ៧ មករា ១៩៧៩ បានទទួលមរណភាពកាលពីថ្ងៃទី៣ មករា ២០២៣ នេះហើយ ។ សូមព្រលឹងលោកបានទៅកាន់សុគតិភព»៕