កាណាដា៖ រដ្ឋាភិបាលកាណាដាបានបង្កើតកំណត់ត្រាសម្រាប់ជនអន្តោប្រវេសន៍ខ្ពស់បំផុតកាលពីឆ្នាំ២០២២កន្លងទៅ ពោលគឺរដ្ឋាភិបាលបានសម្រេចផ្តល់នូវសិទ្ធិស្នាក់នៅអចិន្ត្រៃយ៍ដល់ជនអន្តោប្រវេសន៍បរទេសប្រមាណ ៤៣៧,០០០នាក់។ នេះបើតាមការបញ្ជាក់់ពីរដ្ឋាភិបាលកាណាដា នៅថ្ងៃទី០៣ ខែមករា ឆ្នាំ២០២៣នេះ ខណៈដែលនេះគឺជាផ្នែកមួយនៃដំណោះស្រាយវិបត្តិទីផ្សារពលកម្មការងារដ៏តានតឹង។

រដ្ឋាភិបាលបានដាក់គោលដៅស្វាគមន៍ជនអន្តោប្រវេសន៍ដោយបានផ្តល់សិទ្ធិស្នាក់នៅអចិន្ត្រៃយ៍ដល់ជនអន្តោប្រវេសន៍ចំនួន ៤៣១,៦៤៥នាក់នៅក្នុងឆ្នាំ២០២២ ខណៈក្រសួងអន្តោប្រវេសន៍បានបញ្ជាក់ថា កាណាដាបានឈានដល់ការសម្រេចចំនួនគោលដៅនេះ ដែលធ្វើឱ្យឆ្នាំ២០២២ ក្លាយជាឆ្នាំដែលកាណាដាទទួលបានប្រជាជនច្រើនបំផុត។ 

ចំនួនជាង ៤សែន៣ម៉ឺននាក់នេះ មានការកើនឡើងប្រមាណ ៩ភាគរយ បើធៀបទៅនឹងឆ្នាំ២០២១ ដែលជាឆ្នាំដែលកាណាដាបានបំបែកកំណត់ត្រាផ្តល់សិទ្ធិស្នាក់នៅអចិន្ត្រៃយ៍កាលពីឆ្នាំ១៩១៣ ខណៈដែលកាណាដាមានគម្រោងបង្កើនការផ្តល់សិទ្ធិស្នាក់នៅអចិន្ត្រៃយ៍ដល់ជនអន្តោប្រវេសន៍ចំនួន ១,៥លាននាក់នៅដំណាច់ឆ្នាំ២០២៥ខាងមុខ។ 

ក្រសួងអន្តោប្រវេសន៍បានបញ្ជាក់ថា ជនអន្តោប្រវេសន៍គឺជាកូនសោរមួយសម្រាប់ដំណោះស្រាយកង្វះពលកម្មក្នុងប្រទេស ខណៈដែលជនទទួលបានសិទ្ធិស្នាក់នៅអចិន្ត្រៃយ៍ទាំងនោះអាចនឹងស្នើសុំសញ្ជាតិកាណាដាបាន ប្រសិនបើពួកគេស្នាក់នៅជាប់លាប់ក្នុងរយៈពេល ៥ឆ្នាំ។ បើតាមទិន្នន័យបច្ចុប្បន្ន ចំនួនជនអន្តោប្រវេសន៍ដែលទទួលបានសញ្ជាតិកាណាដា នឹងមានការកើនឡើងដល់ ៣០ភាគរយនៃចំនួនប្រជាជនសរុបនៅឆ្នាំ២០៣៦៕