ចក្រភពអង់គ្លេស៖ លោកនាយករដ្ឋមន្រ្តីអង់គ្លេស Boris Johnson នៅព្រឹកថ្ងៃចន្ទ ទី១២ ខែកក្កដានេះ បានប្រកាសថ្កោលទោសយ៉ាងពេញទំហឹង ចំពោះការប្រើប្រាស់សាររើសអើង និងប្រកាន់ពូជសាសន៍ ទៅលើកីឡាកររបស់ក្រុមជម្រើសជាតិអង់គ្លេស គ្រាដែលពួកគេបរាជ័យក្នុងការប្រកួតវគ្គផ្តាច់ព្រ័ត្រ UEFA Euro ២០២០ ទល់នឹងក្រុមជម្រើសជាតិអ៉ីតាលី។ 

លោក Boris Johnson បានសរសេរនៅលើបណ្តាញសង្គម Twitter របស់លោកផ្ទាល់ថា៖ "ក្រុមជម្រើសជាតិអង់គ្លេសនេះ គួរតែទទួលបានការកោតសរសើរដូចជាវីរបុរស ពុំមែនត្រូវទទួលបានការមាក់ងាយរើសអើងពូជសាសន៍បែបនេះទេ"។ ការលើកឡើងរបស់លោក Jonhson បែបនេះ​ បន្ទាប់ពីកីឡាករបីរូបរបស់ក្រុមជម្រើសជាតិអង់គ្លេសរួមមាន Jadon Sancho, Bukayo Saka និង Marcus Rashford ត្រូវបានអ្នកគាំទ្រអង់គ្លេសមួយចំនួនប្រើប្រាស់ពាក្យសម្តីមាក់ងាយ រើសអើងជាតិសាសន៍ និងពណ៌សម្បុរ ក្រោយពួកគេបរាជ័យបាល់ ១១ម៉ែត្រកាត់សេចក្តី នាំឱ្យអង់គ្លេសខកខានឱកាសឈ្នះពានអឺរ៉ុបលើកដំបូងរបស់ខ្លួន។ 

លោកបានលើកឡើងបន្ថែមទៀតថា៖ "ចំពោះអ្នកដែលបានប្រព្រឹត្តិទង្វើមាក់ងាយ រើសអើងបែបនេះ គួរណាស់តែចេះមានភាពខ្មាសអៀនចំពោះទង្វើរបស់ខ្លួនឯង"៕