ឥណ្ឌូណេស៊ី៖ រដ្ឋាភិបាលឥណ្ឌូណេស៊ី បានសម្រេចអនុម័តនូវផែនការដំបូងនៃការអភិវឌ្ឍន៍តំបន់ទាញយកឧស្ម័នធម្មជាតិ ជាមួយនឹងតម្លៃនៃការវិនិយោគសរុបប្រមាណ ៣,០៧ពាន់លានដុល្លារអាមេរិក ជាកញ្ចប់ថវិការចំណាយរហូតដល់មានសង្វាក់ផលិតកម្មដំបូង។ នេះបើតាមការប្រកាសរបស់ក្រុមការងារទទួលបន្ទុកកិច្ចការប្រេង និងឧស្ម័ន SKK Migas របស់ឥណ្ឌូណេស៊ីបានឱ្យនៅថ្ងៃចន្ទ។

តំបន់នៃការអភិវឌ្ឍន៍នេះ ត្រូវបានគេឱ្យឈ្មោះថា The Tuna Field ដែលស្ថិតនៅក្នុងសមុទ្រចិនខាងត្បូង ចន្លោះប្រទេសឥណ្ឌូណេស៊ី និងវៀតណាម ត្រូវបានគេរំពឹងថានឹងឈានដល់ការផលិតខ្ពស់បំផុត 115 លានហ្វីតគូបក្នុងមួយថ្ងៃ។ នេះបើតាមការបញ្ជាក់របស់អ្នកនាំពាក្យរបស់ SKK Migas លោក Mohammad Kemal។

កន្លងមក រដ្ឋមន្រ្តីក្រសួងថាមពលឥណ្ឌូណេស៊ី ធ្លាប់បានបញ្ជាក់ថា ឧស្ម័នធម្មជាតិដែលរកបានពី The Tuna Field ដែលប្រតិបត្តិការដោយក្រុមហ៊ុន Harbour Energy នឹងត្រូវនាំចេញទៅកាន់ប្រទេសវៀតណាម នាឆ្នាំ២០២៦។

កន្លងមក ប្រទេសចិនធ្លាប់បានទាមទារអធិបតេយ្យភាពលើស្ទើរតែទាំងស្រុងលើសមុទ្រចិនខាងត្បូង ដោយផ្អែកតាមផែនទីប្រវត្តិសាស្រ្តរបស់ខ្លួន ដោយអះអាងបន្ថែមថា សេចក្តីសម្រេចរបស់តុលាការមជ្ឈត្តកម្មអន្តរជាតិកាលពីឆ្នាំ២០១៦ សម្រេចដោយមិនមានមូលដ្ឋានផ្លូវច្បាប់៕