ក្រចេះ ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានផ្ដើមសុន្ទុរកថារបស់សម្ដេចដោយបានរម្លឹកពីពេលដែលសម្ដេចបានរៀបអាពាហ៍ពិពាហ៍ក្នុងសម័យខ្មែរក្រហម ក្នុងខែដែលមេឃចុះត្រជាក់ដូចពេលនេះ។
ថ្លែងក្នុងពេលបើកការដ្ឋានសាងសង់ស្ពានភ្ជាប់ទន្លេមេគង្គពីស្រុកចិត្របុរី ទៅស្រុកព្រែកប្រសព្វ ក្នុងខេត្តក្រចេះ ព្រឹកថ្ងៃទី២ ខែមករា ឆ្នាំ២០២៣នេះ សម្ដេចតេជោ ហ៊ុន សែន ថាបើធៀបនឹងការរៀបអាពាហ៍ពិពាហ៍បច្ចុប្បន្នសម្ដេចនិងសម្ដេចកិត្តិព្រឹទ្ធបណ្ឌិតមិនបានរៀបចំអាពាហ៍ពិពាហ៍ហ៊ឹកហាក់ដូចបច្ចុប្បន្ននោះទេ។
សម្ដេចថា៖ «ពេលនោះការ១២គូ រកតែកន្លែងផ្សំដំណេកមិនបាន»។
សម្ដេចតេជោ ហ៊ុន សែន បានរៀបអាពាហ៍ពិពាហ៍ជាមួយសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នៅថ្ងៃទី៥ ខែមករា ឆ្នាំ១៩៧៦ ក្នុងសម័យខ្មែរក្រហម និងបានរក្សាក្ដីស្នេហ៍នេះរហូតដល់បច្ចុប្បន្ននិងរឹងមាំ។
ក្ដីស្នេហារវាងសម្ដេចតេជោ និងសម្ដេចកិត្តិព្រឹទ្ធបណ្ឌិតជាគំរូមួយដល់ពលរដ្ឋ ពីការស្រលាញ់ ការថែរក្សាគ្នា យកចិត្តទុកដាក់ឲ្យគ្នា និងការពារគ្នា។
ជារឿយៗសម្ដេចតេជោ តែងតែបង្ហាញក្ដីស្រលាញ់របស់សម្ដេចចំពោះសម្ដេចកិត្តិព្រឹទ្ធិបណ្ឌិតនៅលើហ្វេសបុករបស់សម្ដេចផ្ទាល់ និងបានសរសេរសៀវភៅពីជីវិតស្នេហារបស់សម្ដេចដែលមានចំណងជើងថា «គូរព្រេងមិនព្រាត់» ដើម្បីជាការចងចាំនូវការតស៊ូនិងលះបង់ចំពោះស្នេហាមួយនេះផងដែរ៕
