បន្ទាយមានជ័យ៖ គិតត្រឹមម៉ោងជិត ១២ថ្ងៃត្រង់ ថ្ងៃទី៣០ ខែធ្នូ ឆ្នាំ២០២២ អ្នកស្លាប់ក្នុងគ្រោះអគ្គិភ័យនៅកាស៊ីណូនៅទីក្រុងប៉ោយប៉ែតកើនឡើងចំនួន ២៥នាក់ ខណៈកងកម្លាំងចម្រុះកម្ពុជា-ថៃ កំពុងបន្តប្រតិបត្តិរុករកសាកសព និងអ្នករងរបួសដែលជាប់គាំងក្នុងអគារ។

អភិបាលរងខេត្តបន្ទាយមានជ័យ លោក ង៉ោ ម៉េងជ្រួន បានបញ្ជាក់ថា សាកសពទាំង ២៥រូបនោះ គឺភាគច្រើនជាជនជាតិថៃ។ ជាមួយគ្នានោះមានអ្នករងរបួសចំនួន ៨០នាក់ ដោយ ៥៥នាក់រងរបួសធ្ងន់ ដឹកទៅសង្រ្គោះបន្ទាន់នៅថៃចំនួន ៥៣នាក់ និងសង្គ្រោះបន្ទាន់នៅមន្ទីរពេទ្យប៉ោយប៉ែតចំនួន ៥នាក់។

លោកបន្តថា ការរុករកសាកសពនៅថ្ងៃទី២៩ ខែធ្នូ មិ្សលមិញនេះ អាជ្ញាធរបានរកឃើញសាកសពចំនួន ១១នាក់ ក្នុងនោះមានជនជាតិថៃ ៩នាក់ ជនជាតិចិន ១នាក់ ជនជាតិនេប៉ាល់ ១នាក់ ហើយនៅថ្ងៃទី៣០ ខែធ្នូ ឆ្នាំ២០២២នេះ កងកម្លាំងចម្រុះបានរុករកបន្តរកឃើញ ១៤នាក់ហើយស្លាប់នៅមន្ទីពេទ្យថៃ ១នាក់។

លោក ង៉ោ ម៉េងជ្រួន បានបញ្ជាក់ថា អគ្គិភ័យនេះបានរលត់ ១០០ភាគរយហើយ ប៉ុន្តែកម្លាំងចម្រុះមានអង្គភាពគ្រោះមន្តរាយ៧១១ កងពលតូចលេខ៧០ សហការជាមួយក្រុមសង្គ្រោះភាគីថៃជិត ១០០នាក់ កំពុងរុករកជាបន្ត៕