ភ្នំពេញ៖ ក្រសួងសុខាភិបាល បានចេញសេចក្តីជូនដំណឹង ស្តីពីការចាក់វ៉ាក់សាំងកូវីដ-១៩ ដូសទី៤ ដល់កុមារអាយុ ៣ឆ្នាំ ដល់ក្រោម ៥ឆ្នាំ ការចាក់វ៉ាក់សាំងកូវីដ-១៩ និងដូសទី៥ សម្រាប់កុមារអាយុ ៥ឆ្នាំ ដល់ក្រោម ១២ឆ្នាំ ព្រមទាំងដូសទី៦ ដល់មន្រ្តីជួរមុខ អាជ្ញាធរ និងប្រជាជនទូទៅ តាមគោលការណ៍ស្ម័គ្រចិត្ត។

សេចក្តីជូនដំណឹងរបស់ក្រសួងសុខាភិបាល នៅថ្ងៃទី៣០ ខែធ្នូ ឆ្នាំ២០២២ បានឱ្យដឹងថា ការចាក់វ៉ាក់សាំងកូវីដ-១៩ ដូសទី៤ ដល់កុមារអាយុ ៣ឆ្នាំ ដល់ក្រោម ៥ឆ្នាំ ការចាក់វ៉ាក់សាំងកូវីដ-១៩ និងដូសទី៥ សម្រាប់កុមារអាយុ ៥ឆ្នាំ ដល់ក្រោម ១២ឆ្នាំ ព្រមទាំងដូសទី៦ ដល់មន្រ្តីជួរមុខ អាជ្ញាធរ និងប្រជាជនទូទៅ នឹងប្រព្រឹត្តទៅចាប់ពីថ្ងៃទី៩ ខែមករា ឆ្នាំ២០២៣ តទៅ។

សារសំឡេងពិសេសទាំងយប់ថ្ងៃទី២៩ ខែធ្នូ ឆ្នាំ ២០២២ របស់នាយករដ្ឋមន្ត្រី សម្ដេចតេជោ ហ៊ុន សែន បានលើកឡើងថា ដោយសារតែមានការរីករាលដាលនៃជំងឺកូវីដ-១៩ នៅបរទេសនិងបារម្ភអំពីការឆ្លងរាលដាលនៃជំងឺនេះនៅក្នុងប្រទេសកម្ពុជាស្របពេលដែលប្រជាជនកម្ពុជាមួយចំនួនពុំបានទៅទទួលវ៉ាក់សាំងកូវីដ-១៩ ដូសជំរុញគ្រប់គ្រាន់ ដូចនេះសម្ដេចតេជោបានបញ្ជាឲ្យចាក់វ៉ាក់សាំងដូសជំរុញទី៤ ដល់កុមារដែលមានអាយុពី ៣ឆ្នាំដល់ ៥ឆ្នាំ និងដូសជំរុញទី៥ ពីរកុមារអាយុ៦ឆ្នាំ ដល់១២ឆ្នាំ និងវ៉ាក់សាំងដូសទី៦ ដល់មន្ត្រីជួរមុខនិងប្រជាជនទូទៅ។

ជាមួយគ្នានេះសម្តេចបានគូសបញ្ជាក់ថា ចាប់ពីពេលនេះតទៅគឺត្រូវតែមានការចាក់វ៉ាក់សាំងជាប្រចាំក្នុងរយៈពេល ៦ខែម្ដង៕