អង់គ្លេស​៖ ក្លិបតោខៀវ Chelsea បានឈានដល់កិច្ចព្រមព្រៀងជាបឋមមួយក្នុងការនាំយកខ្សែប្រយុទ្ធសញ្ជាតិកូឌីវ័រ David Datro Fofana ពីក្លិបជើងឯកលីគកំពូលណ័រវេយ៍ Molde FK។ នេះបើតាមការបញ្ជាក់ពីភាគីក្លិបណ័រវេយ៍ឱ្យដឹងនៅថ្ងៃនេះ។

យ៉ាងណាមិញ បើតាមព័ត៌៌មានប្រភពដដែលបានឱ្យដឹងថា កិច្ចព្រមព្រៀងផ្ទេរកីឡាករវ័យ ២០ឆ្នាំរូបនេះ មិនត្រូវបានទម្លាយឱ្យដឹងពីតម្លៃពិតប្រាកដឡើយ ខណៈរូបគេនឹងត្រូវចូលរួមជាមួយក្លិប Chelsea ចាប់ពីថ្ងៃទី០១ ខែមករា ឆ្នាំ២០២៣នេះតទៅ។ បើតាមប្រភពផ្សេងទៀតបានឱ្យដឹងថា Chelsea បានព្រមព្រៀងទិញយកកីឡាកររូបនេះក្នុងតម្លៃប្រមាណ ១៣,១លានដុល្លារអាមេរិក ដែលជាតម្លៃផ្ទេរក្នុងកំណត់ត្រាបាល់ទាត់ណ័រវេយ៍។ 

Fofana ទើបតែបានបង្ហាញខ្លួនជាមួយក្រុមជម្រើសជាតិកូឌីវ័រ ក្នុងជ័យជម្នះ ៤-០ ក្នុងការប្រកួតមិត្តភាពអន្តរជាតិកាលពីខែវិច្ឆិកាកន្លងទៅ ទល់នឹងប្រទេសប៊ូរុនឌី។ 

កីឡាករ David Datro Fofana ផ្ទេរមកពីក្លិប AFAD Djékanou នៃលីគអាជីពប្រទេសកូឌីវ័រ មកកាន់ទ្វីបអឺរ៉ុបចូលរួមជាមួយក្លិប Molde កាលពីឆ្នាំ២០២១ និងបានក្លាយជាកីឡាករស៊ុតបញ្ចូលទីច្រើនជាងគេ (Top Scorers) ប្រចាំលីគណ័រវេយ៍រដូវកាល ២០២២ ដោយរកគ្រាប់បាល់បញ្ចូលទីបាន ១៥គ្រាប់៕