បាត់ដំបង៖ ត្រីអណ្ដែងជាច្រើនក្បាលងាប់អណ្ដែតពេញទឹកក្នុងដែនអភិរក្ស រាំងពេន៣ត ស្ថិតក្នុងស្រុកឯកភ្នំ ខេត្តបាត់ដំបង ជារៀងរាល់ថ្ងៃចាប់តាំងពីថ្ងៃទី១៥ ខែធ្នូ មក។

តាមការឱ្យដឹងពីអនុប្រធានសហគមតំបន់អភិរក្ស រាំងពេន៣ត លោក ហោ សំអាត បានប្រាប់ឲ្យដឹងនៅល្ងាចថ្ងៃទី ២៧ ខែធ្នូ ឆ្នាំ២០២២ ត្រីអណ្តែងបានងាប់អណ្ដែតពេញទឹកលាតសន្ធឹងរាប់សិបហិកតាក្នុងដែនអភិរក្សដោយមិនដឹងពីមូលហេតុនៅឡើយទេ។

លោកបន្តថា៖ «ពូជត្រីអណ្តែងដែលងាប់នៅក្នុងតំបន់អភិរក្សដ៏គួឲ្យព្រួយបារម្ភនេះមានអាយុប្រមាណជា ៤ ទៅ ៥ខែ និងក្នុងមួយក្បាលៗមានទម្ងន់ពី ២ ទៅ៣ខាំ ហើយករណីប្រទះឃើញសត្វត្រីងាប់នេះលើកទី២ហើយ ខណ:នៅឆ្នាំ ២០១៨ មានត្រីងាប់យ៉ាងច្រើនដូចគ្នាដែរ ប៉ុន្តែជាពូជត្រីផ្ទក់ និងត្រីរ៉ស់»។

បើតាមលោក ហោ សំអាត បញ្ហាត្រីងាប់នេះមិនមានការយាយីពីការលួចឆក់ ត្រូវថ្នាំពុល ឬពុលទឹកនោះទេ ខណៈក្រុមការងារនិងបន្តតាមដានស្រាវជ្រាវបន្ថែមចំពោះករណីខាងលើនេះ៕