ក្រចេះ៖ មន្ទីរបរិស្ថានខេត្តក្រចេះអះអាងថាមិនមានករណីមន្រ្តីបរិស្ថានខេត្តក្រចេះឃាត់ម៉ូតូ រ៉ឺម៉ក ដើម្បីជំរិតទារប្រាក់ទេ ហើយនឹងស្រាវជ្រាវស្វែងរកជនដែលបន្លំធ្វើជាមន្ត្រីបរិស្ថាននោះមកចាត់ការតាមច្បាប់។

ការចេញបដិសេធបែបនេះ ក្រោយមានបុគ្គលម្នាក់អះអាងថាជាមន្ត្រីបរិស្ថានខេត្តក្រចេះ ធ្វើការឃាត់ម៉ូតូរ៉ឺម៉ក ដឹកគ្រែ និងតុបន្តិចបន្តួចរបស់ប្រជាពលរដ្ឋលក់ដូរ ដើម្បីជំរិតទារប្រាក់ នៅក្នុងឃុំអូរគ្រៀង ស្រុកសំបូរ ខេត្តក្រចេះ។

ក្នុងសេចក្តីប្រកាសព័ត៌មានចុះថ្ងៃទី២៦ ខែធ្នូ ឆ្នាំ២០២២ មន្ទីរបរិស្ថានខេត្តក្រចេះ បានបញ្ជាក់ថា បុគ្គលខាងលើនេះមិនមែនជាមន្ត្រីរាជការ នៃមន្ទីរបរិស្ថានខេត្តក្រចេះនោះទេ ហើយនឹងស្រាវជ្រាវរកកំណត់អត្តសញ្ញាណជនដែលប្រព្រឹត្តដើម្បីចាត់វិធានការផ្លូវច្បាប់។

ចំពោះករណីនេះដែរ មន្ទីរបរិស្ថានខេត្តក្រចេះមានការសោកស្តាយចំពោះសកម្មភាពរបស់ជនមួយក្រុមតូច ដែលតែងតែចេញមុខ មកអះអាង និង បន្លំខ្លួនជាមន្ត្រីបរិស្ថាន ដើម្បីធ្វើការទប់ស្កាត់បទល្មើសធនធានធម្មជាតិ ដែលការពិតជនទាំងនោះបានបំពុលសង្គមដោយយកឈោ្មះបរិស្ថាន ជាគោលក្នុងការជម្រិតទារប្រាក់សាធារណៈជនជាហូរហែស្ទើរគ្រប់ទីកន្លែង។

ជាមួយគ្នានេះដែរ មន្ទីរបរិស្ថានខេត្តក្រចេះក៏សង្ឃឹមថា បុគ្គលដែលតាំងខ្លួនជាអ្នកការពារ និងអភិរក្សធនធានធម្មជាតិទាំងអស់នោះ បញ្ឈប់នូវសកម្មភាពក្លែងបន្លំយកឈ្មោះមន្ទីរបរិស្ថានមកប្រើប្រាស់បន្តទៀត៕