ចិន៖ ខេត្តហ្សឺជាំង (Zhejiang) ជាខេត្តឧស្សាហកម្មធំបំផុតមួយរបស់ចិន ស្ថិតនៅក្បែរទីក្រុងសៀងហៃ កំពុងប្រយុទ្ធជាមួយអត្រាចំនួនអ្នកឆ្លងកូវីដ-១៩ថ្មីប្រមាណជា ១លានករណីក្នុងមួយថ្ងៃ ដែលតួលេខនេះរំពឹងថាមានការកើនឡើងទ្វេរដងនៅប៉ុន្មានថ្ងៃខាងមុខនេះ។ នេះបើតាមការបញ្ជាក់របស់មន្រ្តីទទួលបន្ទុកក្នុងតំបន់បានឱ្យដឹងនៅថ្ងៃទី២៥ ម្សិលមិញ។ 

បើទោះបីជាមានការកត់ត្រាតួលេខអ្នកឆ្លងខ្ពស់បំផុតនៅទូទាំងប្រទេសក៏ដោយ ប៉ុន្តែអាជ្ញាធរសុខាភិបាលចិននៅតែបន្តរាយការណ៍ពីករណីគ្មានអ្នលស្លាប់ដោយសារកូវីដ-១៩ រយៈពេល ៥ថ្ងៃជាប់ៗគ្នាមកហើយ។ នេះបើតាមការបញ្ជាក់ពីមជ្ឈមណ្ឌលគ្រប់គ្រងគ្រោះមហន្តរាយ និងជំងឺឆ្លងរបស់ចិនបញ្ជាក់កាលពីថ្ងៃអាទិត្យ។ 

ប្រជាជន និងអ្នកជំនាញ បានអំពាវនាវឱ្យមានទិន្នន័យត្រឹមត្រូវបន្ថែមទៀត ខណៈដែលការឆ្លងបានកើនឡើង បន្ទាប់ពីទីក្រុងប៉េកាំងបានធ្វើការផ្លាស់ប្តូរយ៉ាងទូលំទូលាយចំពោះគោលនយោបាយសូន្យ-COVID ដែលបានធ្វើឱ្យពលរដ្ឋរបស់ខ្លួនរាប់រយលាននាក់ស្ថិតនៅក្នុងភាពមិនច្បាស់លាស់នៅការគ្រប់គ្រងពាក់ព័ន្ធនឹងកូវីដ-១៩ និងបានជះឥទ្ធិពលជាខ្លាំងចំពោះសេដ្ឋកិច្ចនៃប្រទេសមហាអំណាចទី២របស់ពិភពលោកមួយនេះ។

ការប៉ាន់ស្មាន និងគ្រប់គ្រងទិន្នន័យនៃអ្នកឆ្លងកូវីដ-១៩ថ្មីកាន់តែលំបាក បន្ទាប់ពីគណៈកម្មាធិការសុខាភិបាលជាតិបានបញ្ឈប់ការចេញផ្សយតួលេខអ្នកឆ្លងកូវីដ-១៩ ថ្មីប្រចាំថ្ងៃ និងប្រគល់តួនាទីនេះទៅ CDC ជំនួសវិញ។

ក្នុងសេចក្តីថ្លែងការណ៍មួយ រដ្ឋបាលខេត្តហ្សឺជាំងបញ្ជាក់ថា ការឆ្លងរាលដាលកម្រិតខ្ពស់ត្រូវគេប៉ាន់ស្មានថានឹងមកដល់ទឹកដីខេត្តហ្សឺជាំង ដែលអាចនឹងរាលដាលខ្លាំងក្នុងថ្ងៃឆ្លងឆ្នាំថ្មី ដែលគេរំពឹងថាតួលេខនៃអ្នកឆ្លងនឹងកើនដល់ ២លាននាក់។ ខេត្តហ្សឺជាំង ដែលមានប្រជាជនប្រមាណ ៦៥,៤លាននាក់បានបញ្ជាក់ថា ក្នុងចំណោមតួលេខនៃអ្នកឆ្លងកូវីដ-១៩ ជាងមួយលាននាក់ មានអ្នកជំងឺប្រមាណ ១៣,០០០នាក់បានសម្រាកព្យាបាលនៅមន្ទីរពេទ្យខេត្ត៕