ក្រុងព្រះសីហនុ៖ កម្លាំងនគរបាលខេត្តព្រះសីហនុ បានឃាត់ជនសង្ស័យចំនួន ៣នាក់ ក្នុងនោះមានម្នាក់ជាម្ចាស់ការ៉ាសឡាន ដែលពាក់ព័ន្ធនឹងសកម្មភាពលួចស្ទួចរថយន្តរបស់ពលរដ្ឋនៅក្នុងសង្កាត់៣ ក្រុងព្រះសីហនុ ដែលចតចោលនៅមុខផ្ទះ។

ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ បានបញ្ជាក់ឱ្យដឹងនៅព្រឹកថ្ងៃទី២១ ខែធ្នូ ឆ្នាំ២០២២ នេះថា ការឈានដល់ឃាត់ជនសង្ស័យបានចំនួន ៣នាក់នោះ គឺបន្ទាប់ពីអាជ្ញាធរបានទទួលពាក្យបណ្តឹងពីពលរដ្ឋដែលបានរាយការណ៍ថា មានជនសង្ស័យចំនួន ២នាក់ បានជិះរថយន្ត ១គ្រឿង ម៉ាកព្រុស ពណ៌ខ្មៅ ប្រដាប់ដោយអាវុធខ្លី១ដើម បានហៅឡានស្ទួចមកលួចឡានរបស់គាត់ម៉ាក DODGE CHALLENGER ពណ៌ខ្មៅ ដែលចតទុកមុខផ្ទះ ដោយរថយន្តរបស់គាត់គឺខូចផ្នែកខាងមុខ ដោយសារការបុកប៉ះ (គ្រោះថ្នាក់ចរាចរណ៍) ដើម្បីរងចាំគ្រឿងបន្លាស់ផ្លាស់ប្ដូរ។

ពេលអាជ្ញាធរបានទទួលបណ្តឹងនេះភ្លាម លោកស្នងការដ្ឋាននគរបាលខេត្តព្រះសីហនុបានបញ្ជាកម្លាំងធ្វើស្រាវជ្រាវយ៉ាងយកចិត្តដាក់ឃាត់បានតៃកុងឡានស្ទូចចំនួន ២នាក់ និងឃាត់បានម្ចាស់ការ៉ាសឡានម្នាក់ យកមកសួរនាំនៅស្នងការដ្ឋាននគរបាលខេត្តព្រះសីហនុ៕