ប្រេស៊ីល៖ ព្រឹត្តិការណ៍បាល់ទាត់ជើងឯកអាមេរិកឡាទីន Copa America នឹងឈានដល់វគ្គផ្តាច់ព្រ័ត្រនៅព្រឹកថ្ងៃចន្ទខាងមុខនេះហើយដែលនឹងជាជំនួបរវាងក្រុមយក្សទាំងពីរនៅអាមេរិកខាងត្បូង ពោលគឺម្ចាស់ផ្ទះប្រេស៊ីល នឹងត្រូវជួបប្រជែងជើងឯកជាមួយអាហ្សង់ទីន។

ក្នុងអំឡុងប្រជុំជាមួយមេដឹកនាំអាមេរិកខាងត្បូង កាលពីថ្ងៃព្រហស្បតិ៍ម្សិលមិញតាមរយៈប្រព័ន្ធអនឡាញ ប្រធានាធិបតីប្រេស៊ីលលោក Jair Bolsonaro បាននិយាយបែបលេងសើចទៅកាន់ប្រធានាធិបតីអាហ្សង់ទីនលោក Alberto Fernandez ថាប្រទេសរបស់លោកនឹងយកឈ្នះអាហ្សង់ទីនក្នុងវគ្គផ្តាច់ព្រ័ត្រ ដល់ទៅ ៥-០។

គួរបញ្ជាក់ថា ការប្រកួតរវាងប្រេស៊ីល និងអាហ្សង់ទីនវគ្គផ្តាច់ព្រ័ត្រ Copa America នឹងធ្វើឡើងនៅកីឡដ្ឋាន Estadio do Maracana ទីក្រុង Rio de Janiero ប្រទេសប្រេស៊ីល។

ជំនួបវគ្គផ្តាច់ព្រ័ត្រនេះផងដែរ នឹងជាឱកាសរបស់ខ្សែប្រយុទ្ធដែលផុតកុងត្រាជាមួយ Barcelona, Lionel Messi ក្នុងការស្វែងរកពានលើកដំបូងឱ្យក្រុមជំរើសជាតិអាហ្សង់ទីន និងបញ្ចប់ការទន្ទឹងរង់ចាំរបស់អាហ្សង់ទីនដែលខកខានឈ្នះជើងឯកសំខាន់ៗណាមួយ ២៨ ឆ្នាំ។

អាហ្សង់ទីនជាក្រុមដែលឈ្នះជើងឯក Copa America ច្រើនជាងគេលំដាប់ទី២ ពោលគឺឈ្នះពាននេះ ១៤ ដង ខណៈអ៊ុយរូហ្កាយជាក្រុមជោគជ័យបំផុតដែលឈ្នះជើងឯក ១៥ ដង។ ប៉ុន្តែអាហ្សង់ទីនបានខកខានឈ្នះជើងឯក Copa America នេះតាំងពីឆ្នាំ ១៩៩៣ រីឯប្រេស៊ីលវិញធ្លាប់ឈ្នះជើងឯក ៩ លើកនិងឈ្នះចុងក្រោយបំផុតនៅឆ្នាំ ២០១៩៕