កូរ៉េខាងត្បូង-ជប៉ុន៖ កងកម្លាំងយោធាកូរ៉េខាងត្បូងនៅថ្ងៃអាទិត្យនេះ បានរាយការណ៍អំពីករណីនៃការបាញ់ផ្លោងម៉ីស៊ីលបាលេស្ទិកចំនួនពីរគ្រាប់ពីសំណាក់កូរ៉េខាងជើង ឆ្ពោះទៅកាន់ឆ្នេរសមុទ្រភាគខាងកើតនៃឧបទ្វីបកូរ៉េ។ 

អនុរដ្ឋមន្រ្តីការពារជាតិជប៉ុន លោក Toshiro Ino និយាយថា ម៉ីស៊ីលបាលេស្ទិកដែលកូរ៉េខាងជើងបានបាញ់នៅព្រឹកនេះ ទំនងជាធ្លាក់នៅក្រៅតំបន់សេដ្ឋកិច្ចផ្តាច់មុខ (EEZ) របស់ប្រទេសជប៉ុន។ យោងតាមក្រសួងការពារជាតិជប៉ុន បានឲ្យដឹងថា កាំជ្រួចទាំងនោះបានហោះដល់រយៈកម្ពស់ ៥៥០គីឡូម៉ែត្រ និងគ្របដណ្តប់រយៈចម្ងាយ ២៥០គីឡូម៉ែត្រ។ យ៉ាងណាក្តី ភាគីជប៉ុនមិនបានរាយការណ៍អំពីទំហំនៃការខូចខាតដែលកើតមានដោយសារការបាញ់ផ្លោងនេះទេ។

ការបាញ់ផ្លោងម៉ីស៊ីលរបស់កូរ៉េខាងជើងនេះ ធ្វ់ើឡើងរយៈពេលប៉ុន្មានថ្ងៃប៉ុណ្ណោះក្រោយពីការធ្វើតេស្តសាកល្បងម៉ាស៊ីនឥន្ធនៈរឹងដែលមានកម្លាំងខ្លាំង ដែលអ្នកជំនាញបាននិយាយថានឹងអនុញ្ញាតឱ្យមានការបាញ់បង្ហោះមីស៊ីលផ្លោងកាន់តែលឿន និងចល័តជាងមុន ខណៈដែលកូរ៉េខាងជើងកំពុងស្វែងរកការអភិវឌ្ឍអាវុធយុទ្ធសាស្ត្រថ្មី និងបង្កើនល្បឿនកម្មវិធីនុយក្លេអ៊ែរ និងមីស៊ីលរបស់ខ្លួន។

ទីភ្នាក់ងារសារព័ត៌មានរដ្ឋ KCNA កាលពីថ្ងៃសុក្របានរាយការណ៍ថា ការសាកល្បងដែលគ្រប់គ្រងដោយមេដឹកនាំកំពូលគីម ជុងអ៊ុន ត្រូវបានធ្វើឡើងកាលពីថ្ងៃព្រហស្បតិ៍នៅឯបរិវេញបាញ់បង្ហោះផ្កាយរណប Sohae របស់កូរ៉េខាងជើង ដែលទីតាំងនេះត្រូវបានប្រើដើម្បីសាកល្បងបច្ចេកវិទ្យាមីស៊ីល រួមទាំងម៉ាស៊ីនរ៉ុក្កែត និងបាញ់បង្ហោះយានអវកាសជាដើម។

ប្រទេសកូរ៉េខាងជើងបានធ្វើការសាកល្បងកាំជ្រួចជាច្រើនដែលមិនធ្លាប់មានពីមុនមកក្នុងឆ្នាំនេះ រួមទាំងមីស៊ីលផ្លោងអន្តរទ្វីប (ICBM) ដែលមានសមត្ថភាពបាញ់ទៅដល់ដីគោករបស់សហរដ្ឋអាមេរិក បើទោះបីជាមានការហាមឃាត់ និងការដាក់ទណ្ឌកម្មពីសហគមន៍អន្តរជាតិក៏ដោយ។ ជាក់ស្តែងកាលពីខែវិច្ឆិកាកន្លងទៅ កូរ៉េខាងជើងបានបាញ់សាកល្បងកាំជ្រួច ICBM ដែលមន្ត្រីជប៉ុនបាននិយាយថា កាំជ្រួចមានសមត្ថភាពធ្វើដំណើរក្នុងចម្ងាយគ្រប់គ្រាន់ដើម្បីទៅដល់ដីគោករបស់សហរដ្ឋអាមេរិក ហើយវាបានចុះចតនៅចម្ងាយតែប្រមាណ ២០០គីឡូម៉ែត្រប៉ុណ្ណោះពីទឹកដីជប៉ុន៕