ភ្នំពេញ៖ ការប្រកួតដណ្តើមចំណាត់ថ្នាក់លេខ៣ នៃពានរង្វាន់ FIFA World Cup នឹងឈានមកដល់នាវេលាម៉ោង ១០យប់នេះ ខណៈអ្នកគាំទ្រទូទាំងពិភពលោកកំពុងទន្ទឹងរង់ចាំមើលថា តើក្រុមណានឹងទទួលចំណាត់ថ្នាក់លេខ ៣ រវាងក្រុមជម្រើសជាតិម៉ារ៉ុក ទល់នឹងក្រុមជម្រើសជាតិក្រូអាត?

ដោយឡែក ក្នុងការ Live របស់ពិធីការិនីវ័យក្មេងមួយរូបគឺកញ្ញា Vicky លើគណនីផ្ទាល់ខ្លួន សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា តាមរយៈគណនីផ្លូវការរបស់សម្តេចគឺ Samdech Hun Sen, Cambodian Prime Minister បានទស្សន៍ទាយថា ក្រុមម៉ារ៉ុកដែលជាក្រុមតំណាងទ្វីបអាហ្រ្វិក នឹងទទួលបានចំណាត់ថ្នាក់លេខ ៣។ សម្តេចបានសរសេរតាមរយៈការខំមិនថា៖ "លើកនេះទ្វីបអាហ្វ្រិកនិងយកលេខ៣គឺម៉ារ៉ុកឈ្នះ"។

គួរបញ្ជាក់ថា កន្លងមកសម្តេចតេជោ​ ក៏ធ្លាប់ទស្សន៍ទាយក្រុមគ្រងជើងឯកឆ្នាំ២០២២នេះផងដែរ ដោយសម្តេចគាំទ្រទៅលើក្រុមជម្រើសជាតិបារាំង ប៉ុន្តែសម្តេចធ្លាប់និយាយលេងសើចថាបាល់មូលមិនអាចដឹងមុនបានទេ។

ការប្រកួតដណ្តើមចំណាត់ថ្នាក់លេខ ៣ នៃព្រឹត្តិការណ៍ FIFA World Cup ២០២២ គឺ​ជាការជួបគ្នារវាងក្រុមជម្រើសជាតិម៉ារ៉ុក ទល់នឹងក្រុមជម្រើសជាតិក្រូអាត ដែលការប្រកួតនឹងធ្វើឡើងនៅវេលាម៉ោង ១០យប់ នាកីឡដ្ឋាន Khalifa International Stadium។ គួររំឮកថា កាលពីឆ្នាំ២០១៨ ក្រុមដែលទទួលបានចំណាត់ថ្នាក់លេខ ៣ គឺក្រុមជម្រើសជាតិប៊ែលហ្សិក ដែលបានយកឈ្នះក្រុមជម្រើសជាតិអង់គ្លេស ២-០៕