ភ្នំពេញ៖ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រខ្មែរ បានតែងតាំង លោក ប្រាក់ ដាវីដ ពីអនុរដ្ឋលេខាធិការ ទៅជារដ្ឋលេខាធិការក្រសួងការបរទេស និងសហប្រតិបត្តិការអន្តរជាតិនៃកម្ពុជា។ ជាមួយគ្នានេះព្រះមហាក្សត្រទ្រង់ក៏បានតែងតាំងមុខតំណែងមន្ត្រីការទូតជាន់ខ្ពស់នៃក្រសួងការបរទេសកម្ពុជាចំនួន១១រូបផងដែរ។ 

យោងតាមព្រះរាជក្រឹត្យដែលចេញផ្សាយនៅថ្ងៃទី១៣ ខែធ្នូ ឆ្នាំ២០២២ ក្នុងចំណោមមន្ត្រីការទូតជាន់ខ្ពស់នៃក្រសួងការបរទេសកម្ពុជាចំនួន ១១រូបដែលព្រះមហាក្សត្រតែងតាំងនោះ មានចំនួន ៧រូបត្រូវបានតែងតាំងជាអនុរដ្ឋលេខាធិការក្រសួងការបរទេសកម្ពុជា ក្នុងនោះមាន លោក អាន សុខខឿន លោក ចាយ ណាវុធ លោក អ៊ូក សោភ័ណ លោក ស៊ឹម វីរៈ លោក កែ សុវណ្ណ លោក ចាន់ រតនា និងលោក អ៊ាត សីលា។ 

លោក ឈូក ប៊ុណ្ណា ត្រូវបានតែងតាំងជាអគ្គនាយកនៃអគ្គនាយកដ្ឋានអឺរ៉ុបអាមេរិក និងអាហ្រិ្វក-មជ្ឈិមបូព៌ា។ លោក ចឺយ វិចិត្ត តែងតាំងជាប្រធានវិទ្យាស្ថានជាតិការទូត និងទំនាក់ទំនងអន្តរជាតិ។ តែងតាំងលោក យៀប សំណាង ជាអគ្គនាយកនៃអគ្គនាយកដ្ឋានអាស៊ាន និងតែងតាំងលោក ទាន សំណាង ជាអគ្គនាយកនៃក្រុមស្រាវជ្រាវ និងព្យាករណ៍៕