អង់គ្លេស៖ គ្រូបង្វឹកក្លិប Manchester United លោក Erik Ten Hag បានលើកឡើងថា ខ្សែការពារ Harry Maguire មានទម្រង់លេងល្អខ្លាំងមែនទែនជាមួយក្រុមជម្រើសជាតិអង់គ្លេស ហើយអ្នកចាត់ការសញ្ជាតិហូឡង់រូបនេះបានលើកទឹកចិត្តឱ្យម្ចាស់អាវលេខ ៥ រូបនេះ រក្សាទម្រង់ដូចនៅជម្រើសជាតិដដែលជាមួយក្លិប ពេលដែលក្របខណ្ឌ​​ Premier League ចាប់ផ្តើមនាពេលខាងមុខ។

Maguire បានបាត់បង់តំណែង ១១នាក់ដំបូងជាមួយក្លិបកាលពីខែសីហាកន្លងទៅ ប៉ុន្តែកីឡាករវ័យ២៩ឆ្នាំរូបនេះ បង្ហាញខ្លួនជា ១១នាក់ដំបូងរបស់អង់គ្លេសគ្រប់ប្រកួតក្នុងព្រឹត្តិការណ៍ FIFA World Cup ២០២២ នៅកាតា ដែលអង់គ្លេសបានឈានដល់វគ្គ ៨ក្រុមចុងក្រោយ និងធ្លាក់ក្រោមថ្វីជើងក្រុមការពារតំណែងជើងឯក បារាំង ក្នុងលទ្ធផល ១-២។

ក្នុងជំរុំហ្វឹកហាត់របស់ក្រុម Man utd នៅទឹកដីអេស្ប៉ាញ លោក Ten Hag និយាយថា៖ "វាច្បាស់ណាស់ថាគេ (Maguire) សក្តិសមសម្រាប់ការប្រកួតប្រជែងកម្រិតខ្ពស់។ គេមានបញ្ហាខ្លះដែលនៅក្លិបគេបង្ហាញទម្រង់លេងមិនសូវល្អ ប៉ុន្តែពិតណាស់គឺវាខុសគ្នា ដោយលេងជាមួយជម្រើសជាតិគេបង្ហាញខ្លួនល្អស្ទើរតែគ្រប់វិនាទីនៃការប្រកួត"។ អតីតគ្រូបង្វឹករបស់ Ajax បន្តថា៖ "យើងចង់ឱ្យគេនាំយកទម្រង់បែបនេះមកកាន់ Manchester ហើយបង្ហាញវាទៅកាន់អ្នកគាំទ្រក្នុងទីលាន។​ ខ្ញុំគិតថាគេមានពេលវេលាដ៏ល្អមួយនៅ World Cup ហើយពេលដែលគេលេងដោយទំនុកចិត្តបែបនេះ គេជាកីឡាករម្នាក់ដ៏សំខាន់សម្រាប់ក្រុម ហើយជាកីឡាករដែលគ្រប់គ្នាចង់បាន"។

គួរបញ្ជាក់ថា ក្លិបបិសាចក្រហម Manchester United នឹងចាប់ផ្តើមការប្រកួតរបស់ខ្លួនឡើងវិញនៅថ្ងៃទី២១ ខែធ្នូខាងមុខនេះ ដោយប៉ះក្រុម Burnley នៃពានរង្វាន់ EFL Cup មុននឹងបន្តប៉ះ Nottingham Forest នៅ Premier League នៅថ្ងៃទី២៧ ខែធ្នូ៕