ភ្នំពេញ៖ អតីតតារាសម្តែងអ្នកនាង សឿ សុធារា បានបង្ហោះសារថ្លែងអំណរគុណដល់រដ្ឋមន្រ្តីក្រសួងព័ត៌មានដែលបានផ្តល់ថវិការមួយចំនួនធំដល់អ្នកនាង ដើម្បីទិញផ្ទះជាទីជំរកថ្មីសម្រាប់គ្រួសារ។

នាព្រឹកថ្ងៃទី១២ ខែធ្នូ ឆ្នាំ២០២២នេះ អ្នកនាង សឿ សុធារ៉ា បានបង្ហោះសារ អរគុណដល់រដ្ឋមន្រ្តីក្រសួងព័ត៌មានលោក ខៀវ កាញារីទ្ធ និងភរិយា ដែលបានផ្តល់ប្រាក់ចំនួន ២០ ០០០ដុល្លារ ដើម្បីទិញផ្ទះដែលជាទីជម្រកចាប់ផ្តើមគ្រួសារថ្មី ដែលក្នុងសារនោះភ្ជាប់ជាមួយក្រដាសកិច្ចព្រមព្រៀងទិញផ្ទះនៅបុរីមួយកន្លែងក្នុងខេត្តកំពង់ស្ពឺ។

ក្នុងសារនោះអ្នកនាង សឿ សុធារ៉ា ថា៖ «នាងខ្ញុំ សឿ សុធារ៉ា ព្រមទាំងកូនៗសូមលើកដៃសំពះដឹងគុណដល់ឯកឧត្តមរដ្ឋមន្រ្តីក្រសួងពត៌មាន ខៀវ កញ្ញារីទ្ធ និងលោកជំទាវ “លោកពុក លោកម៉ែ“ ដែលបានផ្តល់ជំរកអោយនាងខ្ញុំនិងកូនៗអោយបានរស់រានមានជីវិតសារជាថ្មីឡើងវិញ ដែលមានតំលៃ ២០ ០០០»

អ្នកនាង សឿ សុធារ៉ា អតីតតារាសម្តែងស្រីរូបនេះមានឱកាសចូលជួបរដ្ឋមន្រ្តីក្រសួងលោក ខៀវ កាញារីទ្ធ កាលពីថ្ងៃទី៩ ខែធ្នូ ឆ្នាំ២០២២ ហើយលោករដ្ឋមន្រ្តីបានផ្តល់ដំបូន្មានល្អ និងលើកទឹកចិត្តឱ្យអ្នកនាងខិតខំសាងជីវិតថ្មី ជាពិសេសបានផ្តល់ថវិកាមួយចំនួនធំ។

អ្នកនាងក៏បានឱ្យដឹងទៀតថា ដើម្បីជាការនឹករលឹកដឹងគុណ អ្នកនាង និងកូនៗនឹងត្រលប់ចូលវិថីសិល្បៈ ខិតខំបំរើដល់សិល្បៈជាថ្មីឡើងវិញ។

គួររំលឹកផងដែលថា អតីតតារាសម្តែងស្រីរូបនេះបានជួបទុក្ខធំដោយអ្នកម្តាយជាទីស្រលាញ់បានទទួលមរណៈភាពកាលពីពេលថ្មីៗកន្លងទៅ ខណៈអ្នកនាងមានសតិមិននឹងនរជាច្រើនឆ្នាំមកហើយតម្រូវឱ្យលេបថ្នាំព្យាបាលជាប្រចាំ ស្របពេល ដែរអ្នកនាងក៍កំពុងជួបវិបត្តិហិរញ្ញវត្ថុធ្ងន់ធ្ងរផងដែរ។