ភ្នំពេញ៖ ជនបរទេសប្រុស-ស្រីចំនួន ១៤៨នាក់ត្រូវបានបណ្តេញចេញដោយអនុលោមតាមច្បាប់អន្តោប្រវេសន៍ និង ហាមឃាត់មិនឱ្យចូលមកកម្ពុជាវិញរយៈពេល ៣ឆ្នាំ ។

តាមសេចក្តីប្រកាសព័ត៌មានរបស់អគ្គនាយកដ្ឋានអន្តោប្រវេស៍បានឱ្យដឹងថា នៅថ្ងៃទី៤-៦ ខែធ្នូ ឆ្នាំ២០២២ ជនបរទេសចំនួន ១៤៨នាក់ មានស្រី ១០នាក់ ក្នុងនោះមានជនជាតិចិន ១៤៥នាក់ កូរ៉េ ២នាក់ និងអេស្តូនី ១នាក់ ត្រូវបានបណ្តេញចេញពីប្រទេសកម្ពុជា ដែលអនុលោមតាមច្បាប់ស្តីពីអន្តោប្រវេសន៍ តាមប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិភ្នំពេញ និង ហាមឃាត់មិនឱ្យចូលប្រទេសកម្ពុជារយៈពេល ៣ឆ្នាំ។

អ្នកនាំពាក្យអគ្គនាយកដ្ឋានអន្តោប្រវេសន៍បានបញ្ជាក់ថា ជនបរទេសដែលបានបណ្តេញចេញទាំង ១៤៨នាក់នោះ គឺត្រូវបានសមត្ថកិច្ចឃាត់ខ្លួនពាក់ព័ន្ធនឹងការលួចចូលមកកម្ពុជា ឆ្លងដែនខុសច្បាប់ គ្មានលិខិតឆ្លងដែន លួចស្នាក់នៅខុសច្បាប់លើសទិដ្ឋាការកំណត់ និងធ្វើការងារខុសច្បាប់។

គួរឱ្យបញ្ចាក់ឱ្យដឹងថា ជនបរទេសទាំងនោះបានប្រព្រឹត្តខុសច្បាប់ល្មើសនឹងច្បាប់ស្តីពីអន្តោប្រវេសន៍ ដោយត្រូវធ្វើការបណ្ដេញចេញតាមប្រកាសក្រសួងមហាផ្ទៃ៕