ភ្នំពេញ៖ សាលាឧទ្ធរណ៍ភ្នំពេញ និងមហាអយ្យការអមសាលាឧទ្ធរណ៍ភ្នំពេញ ចេញសេចក្តីជូនដំណឹងពីការលើកពេលសវនាការដែលបានគ្រោងទុក ព្រោះត្រូវប្តូរទៅទីតាំងថ្មីដើម្បីរៀបចំឱ្យបានល្អប្រសើរ។

ក្នុងសេចក្ដីជូនដំណឹងចុះថ្ងៃទី៨ ខែធ្នូ ឆ្នាំ២០២២ សាលាឧទ្ធរណ៍ភ្នំពេញបានជម្រាបដល់ថ្នាក់ដឹកនាំក្រសួង ស្ថាប័ន សាលាជម្រះក្តីគ្រប់ជាន់ថ្នាក់ សមាជិក-សមាជិកានៃគណៈមេធាវីនៅកម្ពុជា និងអង្គភាពពាក់ព័ន្ធនានា ព្រមទាំង សាធារណជនឱ្យបានដឹងថា សាលាឧទ្ធរណ៍ភ្នំពេញនឹងធ្វើការលើកពេលសវនាការដែលបានគ្រោងទុក ចាប់ពីថ្ងៃទី២ ខែមករា ឆ្នាំ២០២៣ រហូតដល់ថ្ងៃទី៣១ ខែមករា ឆ្នាំ២០២៣ ទៅពេលក្រោយវិញ លើកលែងតែសំណុំរឿងមួយចំនួន ដែលមានភាពចាំបាច់ស្របតាមលក្ខខណ្ឌច្បាប់ ដែលក្រុមប្រឹក្សាសម្រេចទៅតាមករណីនីមួយៗ ដោយគិតទាំងសិទ្ធិស្របច្បាប់របស់គូភាគី។

ចំពោះការបំពេញកិច្ចការងាររដ្ឋបាលប្រចាំថ្ងៃ និងការផ្តល់សេវាសាធាណៈអគ្គលេខាធិការ ដ្ឋានរដ្ឋបាលសាលាឧទ្ធរណ៍ភ្នំពេញ នៅដំណើរការធម្មតាជារៀងរាល់ថ្ងៃធ្វើការ។

សេចក្តីជូនដំណឹងក៏បានបញ្ជាក់ទៀតថា សាលាឧទ្ធរណ៍ភ្នំពេញត្រូវផ្លាស់ប្ដូរទីតាំង ក្នុងបរិវេណក្រសួងយុត្តិធម៌ ទៅទីតាំងថ្មីនៅអគារសាលាយុត្តិធម៌តំបន់អភិវឌ្ឍន៍ OCIC ក្នុងសង្កាត់ព្រែកលាប ចាប់ពីថ្ងៃទី៩ ខែមករា ឆ្នាំ២០២៣ ដើម្បីរៀបចំកន្លែងធ្វើការ និងសាលសវនាការឱ្យបានល្អប្រសើរ៕