វៀតណាម៖ បណ្តាក្រុមប្រទេសឧស្សាហកម្មទាំងប្រាំពីរ (G7) បានស្នើផ្តល់ថវិកាប្រមាណជា ១៥ពាន់លានដុល្លារអាមេរិកទៅកាន់ប្រទេសវៀតណាមនៅក្នុងកិច្ចប្រជុំកំពូលមួយ ដើម្បីឱ្យវៀតណាមព្រមព្រៀងក្នុងការកាត់បន្ថយ និងពន្លឿនការចាកចេញពីការប្រើប្រាស់នូវថាមពលធ្យូងថ្ម។ 

វៀតណាម គឺជាប្រទេសកំពូលទាំង ២០ក្នុងពិភពលោកលើការប្រើប្រាស់ថាមពលចេញពីធ្យូងថ្ម ដំបូងឡើងគ្រោងនឹងចុះកិច្ចព្រមព្រៀងភាពជាដៃគូអន្តរកាលនៃថាមពលជាមួយ​បណ្តាប្រទេសជាដៃគូ G7 នៅក្នុងវេទិកាសកលមួយស្តីពីការអាកាសធាតុ COP27 កាលពីខែវិច្ឆិកាកន្លងទៅ ប៉ុន្តែមិនបានសម្រេចលើការចរចានេះ។ 

ដើម្បីបញ្ចុះបញ្ចូលវៀតណាមឱ្យយល់ព្រមចំពោះកិច្ចព្រមព្រៀងនេះ ក្រុមអ្នកចរចាដែលដឹកនាំដោយសហភាពអឺរ៉ុប និងចក្រភពអង់គ្លេសបានលើកគម្រោងស្តីពីកញ្ចប់ថវិកាធំមួយដែលរួមមានជាង ១៥ពាន់លានដុល្លារបានមកពីវិស័យសាធារណៈ និងវិស័យឯកជន។ ប្រភពពីមន្រ្តីដែលមិនបញ្ចេញឈ្មោះត្បិតនេះជាកិច្ចការសម្ងាត់ បានលើកឡើងថានះគឺជាការផ្តល់ជូនចុងក្រោយបំផុតសម្រាប់វៀតណាម មុននឹងឈានដល់កិច្ចប្រជុំកំពូលនៃសហភាពអឺរ៉ុប ជាមួយបណ្តាប្រទេសនៃតំបន់អាស៊ីអាគ្នេយ៍ នៅក្នុងទីក្រុងប្រ៊ុចសែល នាថ្ងៃទី១៤ ខែធ្នូខាងមុខនេះ។

ពាក់ព័ន្ធនឹងព័ត៌មាននេះ ទាំងភាគីវៀតណាម និងសហភាពអឺរ៉ុប មិនទាន់មានការឆ្លើយតបផ្លូវការណាមួយឡើយ៕