សៀមរាប៖ នាយករដ្ឋមន្ត្រីកម្ពុជា និងជាប្រធានអាស៊ានឆ្នាំ២០២២ សម្ដេចតេជោ ហ៊ុន សែន បានជំរុញទៅតំបន់ប្រជាជាតិអាស៊ីអាគ្នេយ៍មួយនេះឱ្យគិតគូរយកចិត្តទុកដាក់លើបញ្ហាសន្ដិសុខផ្នែកសុខភាព និងអាកាសធាតុដោយថាបញ្ហានទាំងនេះគឺកំពុងតែកើតមានជាបន្ទុកក្នុងការដោះស្រាយទាំងបច្ចុប្បន្ន និងអនាគត។

ថ្លែងក្នុងការបើកកិច្ចប្រជុំរដ្ឋមន្ត្រីការពារជាតិអាស៊ានបូក លើកទី៩ នៅសណ្ឋាគារសុខាអូតែល ខេត្តសៀមរាប ព្រឹកថ្ងៃទី២៣ ខែវិច្ឆិកា ឆ្នាំ២០២២ សម្ដេចតេជោ ហ៊ុន សែន បានលើកឡើងថា៖ «ជំងឺរាតត្បាតកូវីដ-១៩ គឺជាសញ្ញាដាស់តឿនឱ្យយើងយកចិត្តទុកដាក់កាន់តែខ្លាំងដល់សន្ដិសុខផ្នែកសុខភាព។ សន្ដិសុខអាកាសធាតុ គឺជាបញ្ហាសំខាន់មួយទៀតដែលយើងចាំបាច់ត្រូវប្រមូលផ្ដុំកិច្ចខិតខំប្រឹងប្រែង និងធនធានបន្ថែមទៀត។ កិច្ចសហប្រតិបត្តិការរវាងស៊ីវិល និងយោធាលើសន្ដិសុខគ្រប់ជ្រុងជ្រោយ គឺកាន់តែមានសារៈសំខាន់»។

អស់រយៈពេល៣ឆ្នាំរួចទៅហើយដែលជំងឺរាតត្បាតកូវីដ-១៩ បានកើតឡើងបង្កជាបញ្ហាក្នុងពិភពលោក និងក្នុងតំបន់អាស៊ាន ខណៈបញ្ហាអាកាសធាតុក៏កំពុងគំរាមកំហែងដូចគ្នា។ ក្នុងខែនេះប្រទេសចំនួន២ក្នុងតំបន់បានរងគ្រោះពីគ្រោះធម្មជាតិដែលប្រទេសម៉ាឡេស៊ីប្រឈមនឹងជំនន់ទឹកភ្លៀង ខណៈប្រទេសឥណ្ឌូនេស៊ីឯណោះវិញបានរងគ្រោះពីគ្រោះរញ្ជួយដីដែលបានសម្លាប់ជីវិតមនុស្ស និងប៉ះពាល់ដល់មនុស្សជាច្រើនម៉ឺននាក់៕ 

^{PHOTO: ហ៊ុន យុទ្ធគុណ}