ភ្នំពេញ៖ បុរសម្នាក់អាយុ ៤៤ឆ្នាំបានលោតសម្លាប់ខ្លួនពីលើអគារខុនដូជាន់ទី១២ មួយកន្លែងស្ថិតក្នុងភូមិ៣ សង្កាត់ជ្រោយចង្វារ ខណ្ឌជ្រោយចង្វា រាជធានីភ្នំពេញ ធ្លាក់មកលើដីបណ្តាលឱ្យស្លាប់ភ្លាមៗ។ ហេតុការណ៍នេះកើតឡើងនៅព្រឹកម៉ោង១០ ថ្ងៃទី២២ ខែវិច្ឆិកា ឆ្នាំ២០២២។

បុរសនោះស្នាក់នៅក្នុងអគារខុនដូរ (កន្លែងកើតហេតុ) បន្ទប់លេខ៥២២ ជាន់ទី៥។ តាមកាមេរ៉ាសុវត្ថិភាពនៅក្នុងអគារខុនដូ និងលើដំបូលជាន់ទី១២ បានបង្ហាញពីសកម្មភាពបុរសរូបនោះបានចាក់សោរបន្ទប់ រួចឡើងទៅលើដំបូលជាន់ទី១២ ដោយដោះស្បែកជើង រួចលោតសម្លាប់ខ្លួនតែម្តង។

ការលោតសម្លាប់ខ្លួនរបស់បុរសខាងលើ គេមិនទាន់ដឹងមូលហេតុច្បាស់លាស់នៅឡើយទេ។ ប៉ុន្តែតាមសាក្សីដែលឃើញហេតុការណ៍បានប្រាប់ឱ្យដឹងថា នៅមុនពេលកើតហេតុ គេឭសំឡេងធ្លាក់អ្វីមួយមកលើស្មៅចំហៀងខាងជើងនៃអគារខុនដូ ហើយអ្នកស្នាក់នៅអគារខាងលើក៏បានមើលឃើញថាជាបុរសម្នាក់បានលោតសម្លាប់ខ្លួនពីលើអគារខុនដូ៕