ភ្នំពេញ៖ ក្រសួងធនធានទឹក និងឧតុនិយម បានចេញសេចក្តីជូនដំណឹងថា ចាប់ពីថ្ងៃទី១៩-២២ ខែវិច្ឆិកា ឆ្នាំ២០២២ នៅតំបន់មាត់សមុទ្រអាចនឹងមានភ្លៀងធ្លាក់ ខ្យល់ និងរលកសមុទ្រខ្ពស់ៗ។
ជាមួយគ្នានេះនៅផ្នែកមួយចំនួននៃរាជធានី-ខេត្ត នៅតំបន់ទំនាបកណ្តាលភាគខាងក្រោម និងភាគពាយព្យ នឹងអាចមានភ្លៀងក្នុងកម្រិតពីតិចទៅបង្គួរ និងច្រើន ដោយអន្លើលាយឡំទៅដោយផ្គរ រន្ទះ និងខ្យល់កន្ត្រាក់។
ស្ថានភាពនេះកើតឡើងក៏ព្រោះតែកម្ពុជានៅថ្ងៃទី១៩ ខែវិច្ឆិកា ឆ្នាំ២០២២នេះ មានសម្ពាធទាបសកម្មមួយកើតនៅលើភាគខាងត្បូងនៃសមុទ្រចិនភាគខាងត្បូង ខាងជើងកោះបវ័ណេអូ ឥណ្ឌូណេស៊ី ដោយសម្ពាធទាបសកម្មនេះនឹងរំកិលដើរឆ្ពោះមកលិចនឹងចូលមកដល់ក្នុងឈូងសមុទ្រថៃនៅថ្ងៃទី២២ ខែវិច្ឆិកា ឆ្នាំ២០២២៕
