ភ្នំពេញ៖ អង្គភាពប្រឆាំងអំពើពុករលួយ បានលើកទឹកចិត្តដល់សាធារណៈជនដែលរស់នៅក្នុងសង្កាត់តាខ្មៅ ក្រុងតាខ្មៅ ខេត្តកណ្ដាល ដែលមានបណ្ណសមធម៌ ហើយមិនទាន់ទទួលប្រាក់ឧបត្ថម្ភ ឱ្យផ្ដល់ព័ត៌មានមកខ្លួនជាបន្ទាន់។ ការជំរុញនេះគឺបន្ទាប់ពីនគរបាលបានបញ្ជូនស្មៀនសង្កាត់តាខ្មៅម្នាក់ទៅឱ្យអង្គភាពនេះស៊ើបអង្កេតបន្ត។

ក្នុងសេចក្ដីប្រកាសព័ត៌មានចុះថ្ងៃទី១៦ ខែវិច្ឆិកា ឆ្នាំ២០២២ អង្គភាពប្រឆាំងអំពើពុករលួយ ACU បានបញ្ជាក់ថាស្មៀនសង្កាត់តាខ្មៅ លោក សុខ សុផា អាយុ ៤៥ឆ្នាំ ត្រូវបានស្នងការដ្ឋាននគរបាលខេត្តកណ្ដាល បញ្ជូនមកអង្គភាព ពាក់ព័ន្ធនឹងការមិនបើកប្រាក់ឧបត្ថម្ភជូនគ្រួសារក្រីក្រ និងងាយរងគ្រោះក្នុងពេលប្រយុទ្ធនឹងជំងឺកូវីដ-១៩។

គួរឱ្យដឹងផងដែរថាស្មៀនសង្កាត់តាខ្មៅ លោក សុខ សុផា ត្រូវបានសមត្ថកិច្ចនាំខ្លួនទៅសួរចម្លើយកាលពីល្ងាចថ្ងៃទី១៤ ខែវិច្ឆិកា បន្ទាប់ពីក្រសួងសង្គមកិច្ចរកឃើញពីភាពមិនប្រក្រតីនៃការបើកប្រាក់ជូនជនក្រីក្រក្នុងសង្កាត់តាខ្មៅពាក់ព័ន្ធនឹងលុយជាង ៦០លានរៀល។

ប្រតិភូរាជរដ្ឋាភិបាលទទួលបន្ទុក និងជាអគ្គនាយកមូលនិធិជាតិជំនួយសង្គមលោក ឈួរ សុបញ្ញា បានឱ្យ EAC News ដឹងថាពិតជាមានករណីឃាត់ខ្លួនស្មៀនសង្កាត់តាខ្មៅ លោក សុខ សុផា ពិតប្រាកដមែន តែលោកថាករណីនេះកំពុងក្នុងដំណាក់កាលស៊ើបអង្កេតបន្ថែមមិនទាន់អាចជម្រាបព័ត៌មានលំអិតនៅឡើយទេ។

លោកបានឱ្យដឹងថាការដែលអាចឈានដល់ការឃាត់ខ្លួននេះគឺដោយសារមានបណ្ដឹងពីប្រជាពលរដ្ឋ ស្របពេលដែល ប្រព័ន្ធត្រួតពិនិត្យការផ្ទេរសាច់ប្រាក់បង្ហាញថាមានភាពមិនប្រក្រត្រីនៅសង្កាត់តាខ្មៅនេះផងដែរ៕