ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានអញ្ជើញចាកចេញពីប្រទេសហើយនៅវេលាម៉ោង ១និង៣០នាទីរសៀល ថ្ងៃទី១៤ ខែវិច្ឆិកា ឆ្នាំ២០២២នេះ ដើម្បីទៅចូលរួមកិច្ចប្រជុំ G20 នៅប្រទេសឥណ្ឌូនេស៊ី។

ទៅចូលរួមកិច្ចប្រជុំ G20 លើកនេះ គឺសម្ដេចតេជោ ហ៊ុន សែន ទៅក្នុងតំណាងប្រធានអាស៊ាន ដែលនឹងចូលរួមប្រជុំពិភាក្សាការងារជាមួយនឹងមេដឹកនាំប្រទេសដែលមានសេដ្ឋកិច្ចខ្លាំងទាំង២០ នៅលើពិភពលោក។

G20 ឬ Group of Twenty គឺជាវេទិកាអន្តររដ្ឋាភិបាលដែលមានប្រទេសចំនួន១៩ និងសហភាពអឺរ៉ុប (EU) ធ្វើការដើម្បីដោះស្រាយបញ្ហាសំខាន់ៗទាក់ទងនឹងសេដ្ឋកិច្ចពិភពលោក ដូចជាស្ថិរភាពហិរញ្ញវត្ថុអន្តរជាតិ ការកាត់បន្ថយការប្រែប្រួលអាកាសធាតុ និងការអភិវឌ្ឍន៍ប្រកបដោយចីរភាព។

គួរដុំផងដែរថាបន្ទាប់ពីកិច្ចប្រជុំជាម្ភៃនេះសម្ដេចតេជោក៏នឹងអញ្ជើញទៅចូលរួមកិច្ចប្រជុំ APEC នៅទីក្រុងបាងកក ប្រទេសថៃផងដែរ។

បើតាមគម្រោងសម្ដេចតេជោ ហ៊ុន សែន នឹងត្រលប់មកកម្ពុជាវិញនៅថ្ងៃទី១៩ ខែវិច្ឆិកា ខាងមុខ៕