ភ្នំពេញ៖ ប្រធានាធិបតីអាមេរិក លោក ចូ បៃដិន បានអញ្ជើញមកដល់ប្រទេសកម្ពុជាហើយនាព្រឹកម៉ោង៨និង៣០នាទីព្រឹក ថ្ងៃទី១២ ខែវិច្ឆិកា ឆ្នាំ២០២២ ដើម្បីចូលរួមកិច្ចប្រជុំកំពូលអាស៊ាន និងកិច្ចប្រជុំកំពូលអាស៊ាន-អាមេរិក លើកទី១០ ដែលប្រព្រឹត្តទៅចាប់ពីព្រឹកថ្ងៃនេះតទៅ។ 

គូសបញ្ជាក់ថា លោកប្រធានាធិបតី ចូ បៃឌិន មកបំពេញទស្សនាកិច្ចនៅកម្ពុជា ចាប់ពីថ្ងៃទី១២ ដល់ថ្ងៃទី១៣ ខែវិច្ឆិកា ឆ្នាំ២០២២ ដើម្បីចូលរួមក្នុងកិច្ចប្រជុំកំពូលប្រចាំឆ្នាំអាមេរិក-អាស៊ាន និងកិច្ចប្រជុំកំពូលអាស៊ីបូព៌ា។

បន្ទាប់មកលោកប្រធានាធិបតីអាមេរិកនឹងបន្តចូលរួមកិច្ចប្រជុំកំពូល G20 ពីថ្ងៃទី១៣ ដល់ថ្ងៃទី១៦ ខែវិច្ឆិកា នៅប្រទេសឥណ្ឌូណេស៊ី។ 

នៅក្នុងប្រជុំដ៏ពិសេសនៅថ្ងៃនេះ អាស៊ាន និងអាមេរិក នឹងត្រូវដំឡើងកម្រិតទំនាក់ទំនងមួយកម្រិតទៀតទៅជាដៃគូយុទ្ធសាស្រ្តគ្រប់ជ្រុងជ្រោយ។ នេះបើតាមការរំពឹងទុករបស់អ្នកនាំពាក្យកិច្ចប្រជុំកំពូលអាស៊ាន លោក គង់ ភោគ។

គូសបញ្ជាក់ថា របៀបវារៈនៃកិច្ចប្រជុំនៅថ្ងៃនេះ នាយករដ្ឋមន្ត្រីកម្ពុជា សម្តេចតេជោ ហ៊ុន សែន និងមេដឹកនាំប្រទេសអាស៊ាន និងប្រទេសពាក់ព័ន្ធនានា នឹងដឹកនាំកិច្ចប្រជុំសំខាន់ៗចំនួន៦ ក្នុងនោះមានកិច្ចប្រជុំកំពូលអាស៊ានបូកបី គឺចិន ជប៉ុន កូរ៉េ លើកទី២៥ កិច្ចប្រជុំកំពូលអាស៊ាន-ឥណ្ឌា លើកទី១៩ កិច្ចប្រជុំកំពូលអាស៊ាន-អូស្ត្រាលី លើកទី២ កិច្ចប្រជុំកំពូលអាស៊ាន-ជប៉ុន លើកទី២៥ កិច្ចប្រជុំកំពូលអាស៊ាន-អាមេរិក លើកទី១០ និងកិច្ចប្រជុំកំពូលខួបអនុស្សាវរីយ៍អាស៊ាន និងកាណាដា។

ក្រោយបញ្ចប់កិច្ចប្រជុំថ្នាក់ដឹកនាំទាំងអស់នឹងប្រារព្ធពិធីជប់លៀង ដោយមេដឹកនាំទាំងអស់នឹងគ្រងសម្លៀកបំពាក់ឈុតប្រពៃណីខ្មែរ៕