អង់គ្លេស៖ រឿងរ៉ាវចុងក្រោយជុំវិញការចរចារវាងក្លិបអង់គ្លេស Manchester United ជាមួយក្លិបអាល្លឺម៉ង់ Borussia Dortmund បានឈានដល់កិច្ចព្រមព្រៀងជាផ្លូវការហើយ ក្នុងតម្លៃ ៧៣លានផោន ក្នុងការនាំយកខ្សែប្រយុទ្ធអង់គ្លេស Jadon Sancho មកកាន់ទឹកដី Old Trafford សម្រាប់រដូវកាលថ្មីនេះ។

បើតាមប្រភពចុងក្រោយបង្អស់បានឱ្យដឹងថា កីឡាករវ័យ ២១ឆ្នាំរូបនេះ នឹងមកដល់ Old Trafford សម្រាប់ការប្រជែងនៅទឹកដីអង់គ្លេសនារដូវកាលថ្មី ក្រោយពេលដែលអង់គ្លេសបញ្ចប់ភារកិច្ចនៅក្នុងព្រឹត្តិការណ៍ EURO 2020។ គួរបញ្ជាក់ថា បច្ចុប្បន្ននេះអង់គ្លេសបានឈានដល់វគ្គ៨ក្រុមចុងក្រោយជាផ្លូវការហើយ ក្រោយពីទម្លាក់ក្រុមឥន្រ្ទីយ៍ដែកអាល្លឺម៉ង់ ត្រឹមវគ្គ១៦ក្រុមចុងក្រោយ និងត្រៀមជួបជាមួយក្រុមជម្រើសជាតិអ៊ុយក្រែន នាកីឡដ្ឋាន Olimpico ទីក្រុងរ៉ូម នាថ្ងៃទី០៤ ខែកក្កដាខាងមុខនេះ។ យ៉ាងណាក្តី កន្លងមក Sancho មិនសូវទទួលបានឱកាសបង្ហាញខ្លួនឡើយក្នុងក្រុមជម្រើសជាតិអង់គ្លេស ជាពិសេសគឺការប្រកួត EURO 2020 នេះក្រោមការដឹកនាំរបស់លោក Gareth Southgate។

ប្រភពដដែលបានបញ្ជាក់ថា ប្រសិនបើកិច្ចព្រមព្រៀងនេះលេចចេញជារូបរាង ១០០ភាគរយ Sancho នឹងចុះកិច្ចសន្យាជាមួយ Manchester United រយៈពេល ៥ឆ្នាំ អមជាមួយកិច្ចសន្យាបន្ថែម ១ឆ្នាំផ្សេងទៀត។

គួរបញ្ជាក់ថា Sancho គឺជាអតីតកីឡាករដុះចេញពីថ្នាលយុវជនរបស់ក្លិប Watford និង Manchester City មុននឹងផ្ទេរទៅកាន់ក្រុមឈុតទី២ របស់ Dortmund នៅឆ្នាំ២០១៧ រួចបង្ហាញខ្លួនជាមួយឈុតធំរបស់ក្លិបតែម្តង ដោយស៊ុតបញ្ចូលទីបានសរុប ៥០ គ្រាប់ និងជួយឱ្យក្លិបឈ្នះពាន German Cup ដោយទម្លាក់ក្រុម RB Leipzig ក្នុងលទ្ធផល ៤-១៕