បាត់ដំបង៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានឲ្យដឹងថារហូតមកដល់ពេលនេះគ្រាប់ពូជស្រូវជាង ៧ពាន់តោនត្រូវបានបញ្ជូនទៅចែកជូនប្រជាពលរដ្ឋ។ 

ថ្លែងក្នុងពិធីចែកពូជស្រូវនិងស្បៀងជូនពលរដ្ឋជាង ១ម៉ឺនគ្រួសារនៅក្នុងខេត្តបាត់ដំបង ព្រឹកថ្ងៃទី២៤ ខែតុលា ឆ្នាំ២០២២ សម្ដេចតេជោបានឱ្យដឹងថារហូតមកដល់ពេលនេះគឺមានខេត្ត២០ ក្នុងចំណោម២៥ បានរងគ្រោះទឹកជំនន់ទឹកភ្លៀងដែលមានមួយចំនួនរងគ្រោះធ្ងន់ធ្ងរ។ ដោយហេតុនេះរដ្ឋាភិបាលបានបញ្ជូនគ្រាប់ពូជចែកដល់ពលរដ្ឋដែលអាចដើម្បីចូលរួមជួយទៅដល់ការស្ដាររបស់ពលរដ្ឋ។ 

សម្ដេចតេជោថា៖ «(នៅបាត់ដំបង) យើងដោះស្រាយមួយម៉ឺនគ្រួសារហើយការដោះស្រាយនេះគឺដោះស្រាយចំពោះអ្នកដែលមានលទ្ធភាពស្ដារឡើងវិញ»។ 

បន្ថែមលើសពីនេះសម្ដេចតេជោបន្ថែមថា រដ្ឋាភិបាលនឹងចែកនូវពូជដំណាំផ្សេងៗដើម្បីចែកជូនដល់ពលរដ្ឋធ្វើការដាំដុះផងដែរ ដោយថាការធ្វើបែបនេះគឺដើម្បីជួយកាត់បន្ថយការលំបាករបស់ប្រជាជន។

សម្ដេចតេជោបានបញ្ជាឲ្យ ក្រសួងកសិកម្មសហការជាមួយអាជ្ញាធរដែនដីដើម្បីពិនិត្យមើលពីទិដ្ឋភាពចែកចាយពូជដំណាំផ្សេងពីស្រូវដល់ពលរដ្ឋរងគ្រោះផងដែរ៕ 

^{PHOTO: ហ៊ុន យុទ្ធគុណ}