បន្ទាយមានជ័យ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានថ្លែងថាជំងឺកូវីដ-១៩ មិនបានចេញឆ្ងាយនៅឡើយទេ តែថាទោះបីជាមានបញ្ហានេះក្ដីតែមិនគួរទុកប្រជាពលរដ្ឋចោលនោះទេ។ សម្ដេចថាបើគ្រាន់តែខ្លាចកូវីដហើយមិនហ៊ានចុះជួបពលរដ្ឋនោះមិនសាកសមជាថ្នាក់ដឹកនាំរដ្ឋនោះទេ។ 

ថ្លែងក្នុងជំនួបជាមួយពលរដ្ឋដែលរងគ្រោះដោយសារទឹកជំនន់ជាង៥ពាន់គ្រួសារ ព្រឹកថ្ងៃទី២៣ ខែតុលា សម្ដេចតេជោ ហ៊ុន សែន បានថ្លែងកោតសរសើរដល់អាជ្ញាធរមានសមត្ថកិច្ចរបស់កម្ពុជាដែលគោរពនូវតួនាទី និងបានចុះជួយពលរដ្ឋទាំងក្នុងពេលមានការឆ្លងរាលដាលខ្លាំងនៃជំងឺកូវីដ-១៩ និងក្រោយវិបត្តិនេះ។

ថ្លែងក្នុងពិធីសំណេះសំណាលជាមួយពលរដ្ឋជាលើកទី៣ ដែលស្ម័គ្រចិត្តរើលំនៅឋានពីតំបន់រមណីយដ្ឋានអង្គរមករស់នៅតំបន់រុនតាឯក នាព្រឹកថ្ងៃទី២១ ខែតុលា ឆ្នាំ២០២២ សម្តេចតេជោបង្ហាញអារម្មណ៍ត្រេកអរនៅពេលដែលកម្ពុជាគ្មានអត្រាឆ្លងជំងឺកូវីដ-១៩ ក្នុងរបាយការណ៍របស់ក្រសួងសុខាភិបាលនៅថ្ងៃទី២០ ខែតុលា ឆ្នាំ២០២២ ដែលថាជាជោគជ័យមួយក្នុងការប្រយុទ្ធប្រឆាំងកូវីដ-១៩ រួមគ្នាសម្រាប់ប្រទេសកម្ពុជា។

សម្តេចតេជោបានសង្កេតឃើញថា ពលរដ្ឋភាគច្រើនទម្លាប់ពាក់ម៉ាស តែក៏មានពលរដ្ឋខ្លះមិនពាក់ម៉ាស់ផងដែរ។ តែយ៉ាងណាសម្តេចលើកទឹកចិត្តឱ្យពលរដ្ឋបន្តពាក់ម៉ាស់ និងអនុវត្តតាមវិធានការសុខាភិបាល៣កុំ និង៣ការពារ។

តាមរបាយការណ៍របស់ក្រសួងសុខាភិបាល គិតត្រឹមថ្ងៃទី២១ ខែតុលា មានអ្នកឆ្លងជំងឺកូវីដ-១៩ ចំនួនជាង ១៣ម៉ឺននាក់ និងអ្នកស្លាប់ចំនួន ៣ ០៥៦នាក់៕

PHOTO: ហ៊ុន យុទ្ធគុណ