ភ្នំពេញ៖ គ្រឹះស្ថានធនាគារនិងហិរញ្ញវត្ថុ បានផ្ដល់ការយោគយល់ និងអនុគ្រោះចំពោះអតិថិជនដែលរងផលប៉ះពាល់ជាក់ស្ដែងដោយសារទឹកជំនន់ធ្ងន់ធ្ងរ ដោយនឹងយកតាមលក្ខខណ្ឌដែលបានកំណត់ដោយធនាគារជាតិនៃកម្ពុជា។

សេចក្តីថ្លែងការណ៍រួម ចុះថ្ងៃទី១៩ ខែតុលា ឆ្នាំ២០២២ គ្រឹះស្ថានធនាគារនិងហិរញ្ញវត្ថុ ដែលជាសមាជិករបស់សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ឱ្យដឹងថាពួកគេនឹងផ្តល់ការអនុគ្រោះចំពោះអតិថិជនដែលរងផលប៉ះ ពាល់ជាក់ស្ដែងដោយសារទឹកជំនន់ធ្ងន់ធ្ងរ។

សេចក្ដីថ្លែងការណ៍រួមដដែលបានបញ្ជាក់ថា គ្រឹះស្ថានធនាគារ និងហិរញ្ញវត្ថុនឹង«ផ្តល់ការអនុគ្រោះតាមរយៈការរៀបចំឥណទានឡើងវិញ តាមលក្ខខណ្ឌដែលបានកំណត់ដោយធនាគារជាតិនៃកម្ពុជា។

ក្នុងនោះ គ្រឹះស្ថានធនាគារនិងហិរញ្ញវត្ថុ បានពិនិត្យលទ្ធភាពក្នុងការបន្ធូរបន្ថយអត្រាការប្រាក់ និងកម្រៃផ្សេងៗ ពាក់ព័ន្ធនឹងឥណទាន និង/ឬ លើកលែងការផាកពិន័យ និងចៀសវាងការរឹបអូសទ្រព្យធានា របស់អតិថិជនប្រកបដោយការយោគយល់និងអធ្យាស្រ័យខ្ពស់ ដែលស្របតាមស្ថានភាពជាក់ស្តែងរបស់អតិថិជន។

គួរឱ្យដឹងថា ការពិនិត្យលទ្ធភាពសម្រាប់ការអនុគ្រោះ និងយោគយល់ ធ្វើឡើងក្រោយពី នាយករដ្ឋមន្រ្តី សម្ដេចតេជោ កាលពីថ្ងៃទី១៧ ខែតុលា ឆ្នាំ២០២២ បានស្នើឱ្យគ្រឹះស្ថានហិរញ្ញវត្ថុ ពិនិត្យលទ្ធភាពដើម្បីធ្វើការអនុគ្រោះ ដោយពន្យារពេលសម្រាប់ការសង និងបន្ធូរបន្ថយការប្រាក់ដល់ពលរដ្ឋ ដែលកំពុងទទួលរងផលប៉ះពាល់ពីគ្រោះទឹកជំនន់ ក៏ដូចជាស្របតាមស្មារតីអង្គប្រជុំ រវាងសមាគមទាំងពីរ ជាមួយធនាគារជាតិនៃកម្ពុជា និងយោងតាមសេចក្តីជូនដំណឹងរបស់ធនាគារជាតិនៃកម្ពុជា កាលពីថ្ងៃទី១៨ ខែតុលា ម្សិលមិញនេះ៕