ភ្នំពេញ៖ នាយករដ្ឋមន្ត្រី សម្ដេចតេជោ ហ៊ុន សែន បានបញ្ជាឱ្យរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក៏ដូចជាអាជ្ញាធរដែនដី ត្រូវនៅកៀកប្រជាពលរដ្ឋដែលរងគ្រោះដោយសារទឹកជំនន់ជានិច្ចនិងវាយតម្លៃជាបន្ទាន់សម្រាប់ធ្វើការអន្តរាគមន៍។

ថ្លែងក្នុងពិធីប្រគល់សញ្ញាបត្រដល់និស្សិតសាកលវិទ្យាល័យជាតិគ្រប់គ្រងជាង ៦ពាន់នាក់នៅព្រឹកថ្ងៃទី១៧ ខែតុលា ឆ្នាំ២០២២ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានបញ្ជាឱ្យរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងអាជ្ញាធរដែនដី ត្រូវនៅកៀកជិតប្រជាពលរដ្ឋជានិច្ច ក៏ដូចជាធ្វើការវាយតម្លៃឱ្យបានត្រឹមត្រូវ និងអន្តរាគមន៍បន្ទាន់ ចំពោះប្រជាពលរដ្ឋដែលរងគ្រោះទឹកជំនន់ ដែលធ្វើឱ្យប៉ះពាល់ដល់ដំណាំស្រូវ។

សម្ដេចមានប្រសាសន៍ថា៖ «ហើយសូមផ្ដាំទៅមន្រ្តីកសិកម្មទាំងអស់ ក៏ដូចជាអាជ្ញាធរដែនដី មិនមែនជិះសេះមើលផ្កាទេ ត្រូវនៅឱ្យជាប់ជាមួយប្រជាពលរដ្ឋ វាយតម្លៃឱ្យត្រូវហើយនៅកៀកកិតជាមួយគាត់។ជួនកាលពូជដាក់ទៅ វាមិនដុះ ហើយជួនកាលវាអាច ពូជខ្លះវាទិញមុន ទិញក្រោយ វាមិនដុះ បើវាមិនដុះ ទៅដោះស្រាយយ៉ាងម៉េចទៀត»។

ក្នុងនោះ សម្ដេច បានបញ្ជាក់ថា ស្ថិតក្នុងកាលៈទេសៈនេះ គឺត្រូវទាមទារឱ្យក្រសួងកសិកម្ម រុក្ខាប្រមាញ់ និងនេសាទ យកចិត្តទុកដាក់ និងធ្វើអន្តរាគមន៍បន្ទាន់ ដោយក្រសួងមិនអាចពន្យារពេលបាននោះឡើយ។

ជាមួយគ្នានេះ សម្ដេចតេជោ បានថ្លែងអំណរគុណដល់សប្បុរសជនទាំងអស់ ក៏ដូចជាកាកបាទក្រហមកម្ពុជា ដែលបានធ្វើការចែកជូនជាជំនួយអង្ករ សម្រាប់ប្រជាពលរដ្ឋដែលរងផលប៉ះពាល់ពីគ្រោះទឹកជំនន់។

សម្ដេចតេជោ បានគូសបញ្ជាក់ថា បើប្រៀបធៀបនឹងស្ថានភាពទឹកជំនន់រវាងឆ្នាំ២០២០ និងក្នុងឆ្នាំនេះ គឺវាមានលក្ខណៈខុសគ្នា ដោយថាកាលពីឆ្នាំ២០២០ រដ្ឋាភិបាលបានធ្វើការអន្តរាគមន៍ទូទៅ ប៉ុន្តែឆ្នាំ២០២២ រដ្ឋាភិបាល ត្រូវធ្វើអន្តរាគមន៍ចំពោះប្រជាពលរដ្ឋដែលប៉ះពាល់ធ្ងន់ធ្ងរជាមុនសិន៕