ភ្នំពេញ៖ តុលាការទីក្រុងប៉ារីស បានប្រកាសសាលក្រមជាផ្លូវការហើយថា សម្ដេចតេជោ មិនស្ថិតនៅពីក្រោយការស្លាប់របស់លោក ហុក ឡង់ឌី ដូចការចោទប្រកាន់របស់ សម រង្ស៉ី នាពេលកន្លងមកទេ។ នេះបើតាមការអះអាងរបស់មេធាវីសម្តេចតេជោ ហ៊ុន សែន គឺលោក គី តិច នៅថ្ងៃទី១០ ខែតុលានេះ។

បន្ទាប់ពីការប្រកាសរបស់តុលាការបារាំងនោះ នាយករដ្ឋមន្ត្រីកម្ពុជាសម្ដេចតេជោ ហ៊ុន សែន បានបង្ហោះខ្លឹមសារនៃសាលក្រមទាំងយប់ ដោយបានសរសេរថា៖ «ទៅពីខ្មែរដល់បារាំងខ្ញុំចង់បានតែប៉ុណ្ណឹង។ សូមអស់លោកដែលចេះភាសាបារាំងអានអត្ថបទទាំងមូលដែលចេញដោយតុលាការបារាំងទើបយល់ច្បាស់»។

សាលក្រមប្រកាសជាភាសាបារាំងរបស់តុលាការទីក្រុងប៉ារីសមានខ្លឹមសារថា៖ «សម រង្សី មិនបានផ្តល់ភស្តុតាងជាក់លាក់ណាមួយ ដើម្បីបង្ហាញអំណះអំណាងរបស់ខ្លួនពីមូលហេតុនៃឧបទ្ទវហេតុនោះគឺជាការផ្ទុះ និងមិនមែនជាអាកាសធាតុអាក្រក់ ដូចដែលដើមបណ្តឹងរដ្ឋប្បវេណីបង្ហាញ ដើម្បីក្លែងបន្លំពីកាលៈទេសៈពិតនៃការស្លាប់របស់ ហុក ឡង់ឌី»។ 

ក្នុងសាលក្រមបានបន្ថែមថា «ទំនាក់ទំនងនៃរូបថតដែលមានគុណភាពអន់នៃបំណែកយន្តហោះមិនអាចបង្ហាញឱ្យឃើញបានឡើយ ក្នុងករណីដែលគ្មានជំនាញថាការបំផ្លិចបំផ្លាញនៃឧទ្ធម្ភាគចក្រគឺដោយសារតែការផ្ទុះជាជាងការធ្លាក់។»។

តាមរយៈសាលក្រមនេះក៏បានឱ្យដឹងទៀតថា វាកើតឡើងពីទាំងមូលថា មូលដ្ឋានការពិតដែលទាក់ទងទៅនឹងការចោទប្រកាន់នេះ គឺមានលក្ខណៈតូចតាច ខណៈពេលដែលវាត្រូវបានបង្កើតឡើងក្នុងរបៀបមួយដើម្បីទុកកន្លែងឱ្យមានការសង្ស័យទាក់ទងនឹងការសន្មត់របស់លោក ហ៊ុន សែន ក្នុងការធ្វើឃាតលោក ហុក ឡងឌី។

តុលាការបារាំង បានប្រកាសបញ្ជាក់បន្ថែមថា៖ «ការចោទប្រកាន់លើលោក ហ៊ុន សែន ថាជាអ្នកឧបត្ថម្ភការឃុបឃិតផ្នែកនយោបាយចំនួនពីរ និងស្វែងរកការលាក់លៀមពីស្ថានការណ៍ដោយធម្មជាតិ ធ្វើឱ្យប៉ះពាល់ដល់កិត្តិយស និងកេរ្តិ៍ឈ្មោះរបស់ដើមបណ្តឹងរដ្ឋប្បវេណី ព្រោះអង្គហេតុដូចបានរៀបរាប់ទំនងជាមានលក្ខណៈព្រហ្មទណ្ឌថាមានភាពស្មុគស្មាញ»។

បើទោះជាបែបនេះក្ដី សម រង្ស៉ី ដែលរងបណ្ដឹងបានសរសេរបង្ហោះលើហ្វេសបុករបស់ខ្លួនដោយអះអាងថា មេធាវីរបស់ខ្លួនបានប្រកាសថា «អតិថិជនរបស់យើង បានទទួលសេចក្តីសម្រេចលើកលែងការចោទប្រកាន់របស់តុលាការទីក្រុងប៉ារីសថ្ងៃនេះដោយក្តីរំភើព»។

សម រង្ស៉ី ថា៖ «តាមរយៈការប្រកាសថា សម រង្ស៊ី គ្មានទោសកំហុសអ្វីទេ តុលាការប្រទេសបារាំង ទទួលស្គាល់ជាឱឡារឹក ថាការតស៊ូរបស់ សម រង្ស៊ី ជាការតស៊ូត្រឹមត្រូវ ហើយតុលាការក៏បានការពារសិទ្ធិសម្តែងមតិរបស់គាត់»។ 

មេធាវីតំណាងសម្ដេចតេជោ ហ៊ុន សែន គឺលោក គី តិច បានឱ្យដឹងថា ឯកសារដែល សម រង្ស៉ី ដាក់ជាសារព័ត៌មានជាឯកសារមានភាពមិនច្បាស់លាស់ ស្រពិចស្រពិលស្មុគស្មាញ ដែលតុលាការពុំអាចទទួលយកមកធ្វើជាសំអាងហេតុឱ្យបានត្រឹមត្រូវច្បាស់លាស់នោះទេ។ 

លោកថា៖ «តុលាការក៏បានលើកសម្អាងហេតុមួយទៀត បញ្ជាក់ច្បាស់ថា សម រង្ស៉ី ពិតជាបាននិយាយបរិហារកេរ្តិ៍ចំពោះសម្តេចតេជោ ដែលពុំអាចប្រកែកបាន»។ 

គួររំលឹកផងដែរថា បណ្តឹងរបស់សម្តេចតេជោ ហ៊ុន សែន និងបណ្តឹងរបស់លោក ឌី វិជ្ជា ប្តឹងទណ្ឌិត សម រង្ស៉ី ត្រូវបានដាក់ចូលតុលាការទីក្រុងប៉ារីស ប្រទេសបារាំងកាលពីថ្ងៃទី២០ ខែសីហា ឆ្នាំ២០១៩ ហើយត្រូវបានចៅក្រមស៊ើបសួរសម្រេចធ្វើការចោទប្រកាន់លើទណ្ឌិត សម រង្ស៉ី ពីបទបរិហាកេរ្តិ៍ជាសាធារណ:ប្រឆាំងបុគ្គល នៅថ្ងៃទី៨ ខែមិថុនា ឆ្នាំ២០២០។

សម្តេចតេជោ ហ៊ុន សែន បានសម្រេចប្តឹងទណ្ឌិត សម រង្ស៉ី ចំពោះសារដែលបុគ្គលនេះបានដាក់ផ្សាយនៅក្នុងទំព័រហ្វេសប៊ុករបស់ខ្លួននិងសំដីដែលបុគ្គលនេះបាននិយាយនៅក្នុងកិច្ចសម្ភាសន៍ជាមួយវិទ្យុសម្លេងសហរដ្ឋអាមេរិកជាភាសាខ្មែរ (VOA) ដែលបុគ្គល សម រង្ស៉ី បានធ្វើការចោទប្រកាន់ចំពោះនាយករដ្ឋមន្ត្រីកម្ពុជាសម្តេចតេជោ ហ៊ុន សែន។ ទណ្ឌិតសម រង្ស៉ី បានអះអាងដោយមួលបង្កាច់ថា (១)- ថាសម្តេចតេជោ បានសម្លាប់ឬជាមេក្លោងឲ្យគេសម្លាប់លោក ហុក ឡងឌី (២)-ថាសម្តេចតេជោ បានបញ្ជាឲ្យសម្លាប់លោកជា វិជ្ជា ។

ការចោទប្រកាន់របស់បុគ្គល សម រង្ស៉ី ខាងលើគឺជាមូលហេតុដែលនាំឲ្យសម្តេចតេជោ ហ៊ុន សែន សម្រេចចិត្តប្តឹងទៅតុលាការបារាំង ហើយតុលាការនឹងត្រូវធ្វើការវិនិឆ្ឆ័យថា «ករណីនេះគឺជាការរំលោភបំពានលើដែននៃសេរីភាពបញ្ចេញមតិ»៕