ភ្នំពេញ៖ អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា និងសហការជាមួយក្រសួងប្រៃសណីយ៍ និងទូរគមនាគមន៍ រួមគ្នាបង្រ្កាបការលួចនាំចូលទូរសព្ទ គ្រឿងអេឡិកត្រូនិក និងគ្រឿងក្រអូបនានា ដែលគេចពន្ធ។

កិច្ចសហការនេះ ត្រូវបានលោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជាប្រាប់ឲ្យដឹងនៅក្នុងសន្និសីទសារព័ត៌មានស្តីពីលទ្ធផលនៃការប្រមូលពន្ធអាករមានស្រាប់ក្នុងប្រទេស នាព្រឹកថ្ងៃទី០៥ ខែតុលា។

លោក គុណ ញឹម បានបញ្ជាក់ថា ទៅមុខទៀត អគ្គនាយកដ្ឋានគយ និងក្រសួងប្រៃសណីយ៍នឹងរួមគ្នាធ្វើយ៉ាងណាទប់ស្កាត់ការលួចនាំចូល និងប្រើប្រាស់ទូរសព្ទគេចពន្ធ។ លោកថ្លែងថា៖«ទៅមុខទៀត យើងមិនដឹងពេលណាទេ តែក្រសួងប្រៃសណីយ៍មានគោលដៅមមួយក្នុងការកំណត់ថា ទូរសព្ទដែលនាំចូល ទាល់តែបង់ពន្ធត្រឹមត្រូវ ទើបអាចភ្ជាប់បណ្តោញជាមួយប្រតិបត្តិករទូរសព្ទចល័តបាន ហើយប្រសិនទូរសព្ទមិនបានបង់ពន្ធអាករទេ ភ្ជាប់ប្រព័ន្ធទូរសព្ទចល័តគឺអត់ដើរ។ អាចប្រើបានតែកាមេរ៉ា ហើយបើប្រើប្រាស់ស៊ីម គឺទាល់តែចុះឈ្មោះលេខទូរសព្ទជាមួយនឹងក្រសួងប្រៃសណីយ៍ ហើយក្រសួងនឹងផ្តល់ឲ្យប្រតិបត្តិករទូរសព្ទចល័តទើបអាចប្រើប្រាស់បាន»។

លោក គុណ ញឹម បានលើកឡើងថា គយចាប់ផ្តើមពង្រឹងលើកិច្ចការងារនេះដើម្បីសំដៅលើការគ្រប់គ្រងទំនិញនាំចូលឲ្យស្របតាមច្បាប់ដែលបានកំណត់។ បើតាមអគ្គនាយកដ្ឋានគយ រាល់ទំនិញដែលនាំចូល គឺត្រូវតែសុំការអនុញ្ញាតពីក្រសួងពាក់ព័ន្ធជាមុន ហើយក៏ត្រូវឆ្លងកាត់ការត្រួតពិនិត្យជាមុនពីអាជ្ញាធរជំនាញ។ ជាពិសេសត្រួតពិនិត្យលើទំនិញដែលនាំចូលផ្តាច់មុខ៕