ហុងគ្រី៖ ប្រធានក្រុមជម្រើសជាតិហូឡង់ Georginio Wijnaldum នឹងពាក់ស្លាកប្រធានក្រុម (Captain) ដោយមានពាក្យថា "One Love" ជាមួយនឹងនិមិត្តសញ្ញាឥន្ធនូ ក្នុងការប្រកួតទល់នឹងក្រុមជម្រើសជាតិសាធារណរដ្ឋឆេក នាកីឡដ្ឋានទីក្រុង Budapest ប្រទេសហុងគ្រី នាវគ្គ១៦ក្រុមចុងក្រោយនៅថ្ងៃអាទិត្យនេះ។

ខ្សែការពារដែលទើបតែចុះហត្ថលេខាចូលរួមជាមួយ PSG ខាងលើបានលើកឡើងបន្ថែមទៀតថា កីឡាករក្នុងក្រុមទាំងមូលនឹងដើរចេញពីទីលានតែម្តង ប្រសិនបើសមាជិកណាម្នាក់ទទួលបាននូវសញ្ញាណនៃការរើសអើង ឬកាយវិការបែបមាក់ងាយ និងស្អប់ខ្ពើមពីសំណាក់អ្នកគាំទ្រ ខណៈកន្លងមកកីឡាករល្បីៗដូចជា Cristiano Ronaldo និង Kylian Mbappe ជាដើម សុទ្ធតែបានទទួលកាយវិការបែបស្អប់ខ្ពើមពីសំណាក់អ្នកគាំទ្រនៅកីឡដ្ឋាន Pukas Arena នេះ កំឡុងការប្រកួតក្នុងពូល F កន្លងមក។

Wijnaldum បានបន្ថែមទៀតថា ការពាក់ស្លាកប្រធានក្រុមមានពណ៌ឥន្ធនូនេះ ក៏ជាការបង្ហាញការមិនពេញចិត្តមួយដែរចំពោះច្បាប់របស់ប្រទេសហុងគ្រី ដែលបានហាមឃាត់មិនឱ្យមានការលើកឡើងជុំវិញបញ្ហាអ្នកស្រឡាញ់ភេទដូចគ្នា (LGBT) ទាំងនៅក្នុងសាលារៀន និងប្រព័ន្ធផ្សព្វផ្សាយផ្សេងៗទៅកាន់ទៅកាន់អនីតិជនវ៏យក្រោម ១៨ឆ្នាំ។ កីឡាករវ័យ ៣០ឆ្នាំរូបនេះក៏បានស្នើទៅកាន់ UEFA បន្ថែមទៀតឱ្យមានការយកចិត្តទុកដាក់ខ្ពស់ ព្រមទាំងមានចំណាត់ការតឹងរ៉ឹងទៅលើកាយវិការបង្ហាញការរើសអើង និងស្អប់ខ្ពើមលើទីលាន ដែលជានិច្ចកាលគេឃើញកើតមានញឹកញាប់ទៅលើកីឡាករ មិនថាការប្រកួតពានរង្វាន់ក្នុងស្រុក និងពានរង្វាន់អន្តរជាតិកន្លងមក៕