ភ្នំពេញ៖ គិតត្រឹមរយៈពេល២ថ្ងៃ អាជ្ញាធររាជធានីភ្នំពេញបង្ក្រាបបានទីតាំងល្បែងស៊ីសងខុសច្បាប់សរុបចំនួន ៣៦ករណី ដោយក្នុងនោះមនុស្សចំនួន ៧០នាក់ត្រូវបានឃាត់ខ្លួន។
ការចុះផ្សាយរបស់ស្នងការដ្ឋានគរបាលរាជធានីភ្នំពេញ នៅថ្ងៃទី១៩ ខែកញ្ញា ឆ្នាំ២០២២នេះ ឱ្យដឹងថា គិតចាប់ពីថ្ងៃទី១៧ រហូតដល់ថ្ងៃទី១៨ ខែកញ្ញា ឆ្នាំ២០២២
ក្រុមការងារចុះបង្ក្រាបល្បែងស៊ីសងខុសច្បាប់នៃស្នងការនគរបាលរាជធានីភ្នំពេញ បានធ្វើការបង្រ្កាបទីតាំងល្បែងស៊ីសងខុសច្បាប់ចំនួន ៣៦ករណី។ ក្នុងនោះ ឃាត់ខ្លួនបានមនុស្សសរុបចំនួន ៧០នាក់ មានស្រ្តី៣៥នាក់ (ជនជាតិចិន ១០នាក់ កូរ៉េ១នាក់ និងអារ៉ាប់ ១នាក់)។
គួរឱ្យដឹងថា ការចុះបង្ក្រាបនេះបានប្រព្រឹត្តទៅក្រោមការអនុវត្តតាមបទបញ្ជារបស់ អភិបាលនៃគណៈអភិបាលរាជធានីភ្នំពេញ លោក ឃួង ស្រេង និ អង្គស្នងរងនិងជាស្នងការនគរបាលរាជធានីភ្នំពេញ លោក ស ថេត ក្រោយពីបានដាក់ចេញនូវផែនការផ្សេងៗ ក៏ដូចជាការបង្កើតក្រុមការងារបង្ក្រាបល្បែងស៊ីសងខុសច្បាប់។
គួរបញ្ជាក់ថា តាមរយៈសារសម្លេងពិសេសរបស់នាយករដ្ឋមន្ត្រីសម្ដេចតេជោ ហ៊ុន សែន កាលពីថ្ងៃទី១៧ ខែកញ្ញា ឆ្នាំ២០២២ បានព្រមានដកតំណែងមន្ត្រីចាប់ពីថ្នាក់អភិបាល ស្រុក ខណ្ឌ រហូតទៅដល់ខេត្ត-រាជធានី រួមទាំងមន្ត្រីនគរបាល និងអាវុធហត្ថចេញពីតំណែង ប្រសិនជាពួកគេមិនអាចបង្ក្រាបល្បែងស៊ីសងខុសច្បាប់នៅក្នុងទឹកដីភូមិសាស្ត្ររបស់ពួកគេបាន។
ក្នុងនោះ សម្ដេចឱ្យដឹងបន្ថែមថា រាជរដ្ឋាភិបាលបានសម្រេចបង្កើតក្រុមការងារថ្នាក់ជាតិមួយ សម្រាប់ការចុះបង្ក្រាបទីតាំងល្បែងស៊ីសងខុសច្បាប់។
មួយវិញទៀត សម្ដេចថា ការបង្កើតក្រុមការងារថ្នាក់ជាតិនេះថ្នាក់អភិបាលស្រុក និងអភិបាលខេត្តក៏ត្រូវមានការងារក្នុងការចុះបង្ក្រាបដោយផ្ទាល់របស់ខ្លួនផងដែរ ខណៈក្រុមការងារថ្នាក់ជាតិក៏មានភារកិច្ចមួយទៀតនឹងស៊ើបអង្កេតលើមន្ត្រីពាក់ព័ន្ធណាដែលរួមចំណែកឃុបឃិតក្នុងការបង្កើតឱ្យមានល្បែងស៊ីសងខុសច្បាប់នៅក្នុងភូមិសាស្ត្រស្រុក-ខេត្តទាំងនោះ។
