ភ្នំពេញ៖ នាយករដ្ឋមន្ត្រីកម្ពុជាសម្ដេចតេជោ ហ៊ុន សែន បានឲ្យដឹងថាសម្ដេចនិងចំណាយទៅលើការបោះពុម្ពសៀវភៅ «សម្ដេចតេជោ ហ៊ុន សែនអ្នកគូសវាសជោគវាសនាកម្ពុជា» ចែកជូនទៅដល់អ្នកដែលចង់អានដោយឥតគិតថ្លៃ តែមិនអាចចែកជាអេឡិចត្រូនិកនោះទេដោយរក្សាសិទ្ធទៅកាន់ម្ចាស់ស្នាដៃ។

ឆ្លើយតបនៅក្នុង comment ហ្វេសបុកផេកទៅកាន់អ្នកដែលស្នើសុំឱ្យសម្ដេចតេជោចែកជា soft copy នៃសៀវភៅនេះ សម្ដេចតេជោ ហ៊ុន សែន បានបញ្ជាក់ថា អាចធ្វើបានលុះត្រាតែមានការអនុញ្ញាតពីអ្នកនិពន្ធនៃសៀវភៅនេះ ដោយសារទាក់ទងនឹងកម្មសិទ្ធិបញ្ញា។

សម្ដេចតេជោថា៖ «ពិតមែនតែជារឿងរបស់ខ្ញុំតែយើងត្រូវគោរពចំពោះការខិតខំរបស់អ្នកសរសេរ។ អ្នកនិពន្ធបានបោះពុម្ពចេញជាសៀវភៅដែលមានគោលដៅបំរើអ្នកអានជាសៀវភៅមិនមែនតាមអនឡាញនោះឡើយ»។

សម្ដេចតេជោ ក៏បានរំលឹកទៅកាន់សៀវភៅ ហ៊ុន សែន បុរសខ្លាំងរបស់កម្ពុជា ដែលនៅពេលនេះមានអាយុកាល ២៤ឆ្នាំហើយ នៅតែមិនអាចអនុញ្ញាតឲ្យបញ្ចេញតាមអនឡាញឬទេដោយសារតែគោរពសិទ្ធិអ្នកនិពន្ធ។

សម្ដេចតេជោថា៖ «សរុបមកមានតែអ្នកនិពន្ធតែម្នាក់គត់ដែលមានសិទ្ធិសម្រេច»។

បើទោះជាយ៉ាងណាដើម្បីចែកជូនដល់អ្នកអានដែលចង់អានសៀវភៅនេះសម្ដេចតេជោនឹងបន្តបោះពុម្ពបន្ថែមចែកជូនដោយអត់គិតថ្លៃ។

សៀវភៅ «សម្ដេចតេជោ ហ៊ុន សែន អ្នកគូសវាសជោគវាសនាកម្ពុជា» បានសរសេរដោយប្រធានគណៈស្រាវជ្រាវប្រវត្តិសាស្រ្តគណបក្សប្រជាជននិងជារដ្ឋមន្ត្រីប្រតិភូអមនាយករដ្ឋមន្ត្រីលោក កែវ បាភ្នំ ដែលសៀវភៅមួយក្បាលដែលមានចំនួន

៦០១ទំព័រ នឹងត្រូវបានសម្ដេចតេជោបញ្ជាឲ្យបោះពុម្ភ៥ម៉ឺនក្បាល រួមទាំងឲ្យបកប្រែជាភាសាអង់គ្លេសបន្ថែមផងដែរ។

បើតាមសម្ដេចតេជោ សៀវភៅនេះបានបញ្ចេញនូវរឿងសម្ងាត់ប្រមាណ ៧០ទៅ ៨០ភាគរយដែលមនុស្សភាគច្រើនមិនបានដឹងពីសម្ដេចនឹងចាំបាច់ត្រូវបញ្ចេញឱ្យដឹងនាពេលនេះ៕