ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បន្តរម្លឹកអនុស្សាវរីយ៍ក្រុមគ្រួសារសម្ដេច បន្ទាប់ពីសម្ដេចបានរកឃើញវីដេអូមួយរវាងឪពុករបស់សម្ដេចនិងចៅទួត។ 

សម្ដេចតេជោបានបង្ហោះលើបណ្ដាញសង្គមរបស់សម្ដេចនៅព្រឹកថ្ងៃអាទិត្យ ទី១១ ខែកញ្ញានេះថា៖ «ទើបឃើញវីដេអូមួយដែលបង្ហាញនូវរូបឪពុកខ្ញុំជាមួយចៅទួតរបស់គាត់គឺកូនស្រីរបស់ ហ៊ុន ម៉ាណែត មុនពេលគាត់ចែកឋានទៅ។ ទោះគាត់ឈឺតែទំនាក់ទំនងរវាងតាទួត និងចៅទួតបានបង្ហាញនូវជ្រុងមួយនៃជិវិតក្នុងគ្រួសារខ្ញុំដែរ»។ 

គួរឲ្យដឹងផងដែរថា ឪពុកបង្កើតសម្ដេចតេជោ ហ៊ុន សែន អ្នកឧកញ៉ាមហាភក្តីសប្បុរិសភោគាធិបតី ហ៊ុន នាង បានទទួលអនិច្ចកម្មនៅថ្ងៃទី១២ ខែកក្កដា ឆ្នាំ២០១៣ ក្នុងជន្មាយុ ៩០ឆ្នាំ ដោយជរាពាធ។ 

ក្នុងខួប៩ឆ្នាំ នៃមរណភាពអ្នកឧកញ៉ាមហាភក្តីសប្បុរិសភោគាធិបតី ហ៊ុន នាង កាលពីព្រឹកថ្ងៃអង្គារ៍ ទី១២ ខែកក្កដា ឆ្នាំ២០២២ សម្ដេចតេជោបានសរសេរបង្ហោះថា៖ «ថ្ងៃនេះជាខួបលើកទី៩ឆ្នាំនៃមរណភាពឪពុករបស់ខ្ញុំ (១២ កក្កដា ២០១៣ -១២ កក្កដា ២០២២)។ កូនគ្មានពាក្យអ្វីក្រៅពីពាក្យនឹកពុកនឹកម៉ែនោះឡើយ»៕